比爸話天氣好...不如去行山
本應冇問題嘅...但係我作病咁...唔係好想去
不過諗諗...去出吓一身汗都好...應該會好得快啲
約埋大姑媽大表姐...一行6人...11點幾出發
行過呢座山...由慈雲山到沙田
我哋起步唔揀上樓梯...行長命斜
沿途好多大比嘅朋友歡迎我哋
奶奶話而家晏咗...晨早嚟佢哋係係路上歡迎我哋
事實上...表面歡迎...實質係睇吓你哋有冇帶食物
有就~~~搶
而家佢哋應該係食飽嘆緊日光浴
吸吓新鮮空氣係唔錯嘅
途經獅子山郊野公園
上到山...會有間士多...係休息補充體力時間
奶奶話係假日先至會多人...平日好靜的
我食咗半隻糯米雞先上山...所以唔太肚餓...叫碗豆腐花就得
10蚊一碗...唔係平...不過勝在夠滑...鐘意有薑味的朋友...會更愛它
有奶奶個friend係度...送了呢份燒賣俾我哋食
大表姐肚餓...而且奶奶話呢度啲牛腩幾好食...所以叫咗一碗試吓
我病病哋冇食...比爸有試過...係唔錯...不過40蚊碗...你睇吓值唔值啦
淨牛腩就30蚊...個出前一丁值10蚊碗架
補充體力完畢...就準備落山
沿途會有幾個燒烤場
大姑媽就話不如元旦日嚟燒嘢食
好~~~
有山有水...落山係行石梯路
感覺唔辛苦...因周邊環境好舒服
行了約3個鐘...見到馬鞍山郊野公園...終於完成了
大比好勁...全程係自己行...冇扭抱過
比爸都諗住佢辛苦...話抱佢...佢好巴閉咁講 : 我自己行
俾10萬個叻你啦!!!
沿路落就係沙田區的屋邨
你睇吓香港住屋幾咁缺...起樓起到上山
但其實市區都有好多吉單位
只不過係你買唔起住唔到咁解囉
如果係晨早行山...落山後可到呢啲屋邨大排檔飲茶
但而家都成三點囉!!!一早收晒啦
又回到城市了...大比雖然話仲要行...不過佢應該好攰...而且亦夠鐘想瞓
係屋邨嘅酒樓醫肚先...然後就各自歸家啦!!!
係天氣真係凍...定係我個人有問題
我冇乜點出汗...但我見其他人有喎
而且我仲開始越嚟越凍
大病來了
回家沖個涼大覺瞓好
沒有留言:
張貼留言