有得食好食啦

估唔到...小豹未出世首要任務係~~~節食
你亞媽我...雖然成日把口話要減肥
之係次次一講到要減食節食
基本上係唔會work
不過今次...唔work都要work
明天見完營養師後
就要小心飲食
唔好話美食啦
我諗連有營養嘅食物都要cut cut cut

所以今日...就盡情食番夠本
早餐先嚟個腸旦牛肉公仔麵加多士
lunch都諗好架啦
食燒味飯
至於晚餐...不嬲都係唔食多同是是旦旦

其實我大肚至今真係唔係重咗好多
都係23磅左右
但唔明點解亞B會過大超重
唔通佢真係咁好人吸收咗我儲落嚟嘅脂肪
我老豆老母覺得見我個個醫生應該係實習
有乜理由我係會有問題喎

我有睇開私家
醫生雖然有話亞B係中碼偏大少少
但就冇同我講我要節食
下個星期再睇
同醫生講吓
睇吓佢俾乜意見我

不過點都好
減食就一定要做
如果唔係...下星期入院check
唔合格就唔俾出院
咪搞我...呢樣我玩唔起
都係乖乖哋忍吓口
可能咁樣一減
今次我可以極速收身呢

日子過得快

隨住聖誕節就來臨
2014即差唔多結束
時間過得真係快
咁樣又過一年

我個肚亦開始進入倒數階段
最後呢兩個月
驗查就特別多
每星期都有一次
加上而家冇咗雙飛父母
確實係少咗好大肚婆
醫院冇咁忙
我哋呢啲本港孕婦都受惠多啲
多項驗查確保BB健康成長
又或者已屬高齡產婦
驗查多都唔出奇

3年前陀大比
都冇咁多嘢驗
而家又要飲糖水
仲要飲兩次
最後個次澤界
雖然唔駛入院接受觀察一日
但就要我再照超聲波睇胎兒size
睇吓會唔會過大
醫生亦叮囑我唔好食咁多碳水化合物嘅嘢
唉！年紀大，運動少
乜事都多啲

今日就係返醫院check baby size
過大的話有機會要你開刀
之前陀第一胎
就希望開刀生
而家反而聽到要開刀
會有啲唔願意咁囉
自然分娩復完得快
開刀的話
睇醫生手勢好唔好
之後傷口痛
要湊BB都幾辛苦
除非你產後有人幫你手啦
我呢啲要親力親為嘅
就梗係越快復元越好戈

********等咗兩個鐘，終於輪到我睇********

照完超聲波
一般人就走得
但係我呢
俾醫生捉住
亞仔size過大
我要見營養師
要跟餐單飲食
仲會被安排入院大半日
食醫院餐，驗血糖，抽血
唉!點解要咁呢
我好似冇暴飲暴食喎
都搞成咁
講真，之前陀大比咪仲激
重成50幾磅
不過好明顯係
個時我全身暴漲
而家就漲係個肚度
係如我所願肥佢唔肥我
但原來肥係邊個度都一樣麻煩
手揸住一張張覆診紙
由每星期有一天返醫院
而家變成每星期返兩次
求神拜佛
希望我唔駛提早係醫院過夜啦！

暑期玩玩玩之約同學仔玩樂一天

雖然只有短短十日嘅暑假(已包埋星期六同日)
但對未懂得暑假係咩一回事嘅大比嚟講
已經係非常滿足
假期咁少好似好殘忍咁
不過諗深啲
俾佢哋係咁易輕鬆吓
新學年開始時
唔會太難適應番返學生活
其實唔算太差姐

難得個女有假期
雖然今個月我都請咗唔少假
不過同老細關係好有人情講
所以都仲可以請到兩日假陪吓個女
陪吓佢玩番兩日啦

原本都頭痛緊唔知帶佢去邊度好
大熱天時...我又大住肚
所以唔想安排啲咁辛苦嘅活動
你話有爸爸幫吓手都仲可以
但係爸爸冇假請呢
點知好好彩
今日放暑假第一天
得到同學仔YY邀請去佢屋企玩
哇...呢啲活動
佢哋happy時我又可以舒舒服服
梗係接受邀請啦

我哋朝早先約埋一齊食早餐先
食飽飽先有氣力玩架嘛
然後就去咗冒險樂園個波波池玩
YY媽媽好鬼勁嘅姐
佢一早已觀察好個波波池幾時係少啲人玩
所以佢就建議我哋食好早餐就先玩呢個活動
人少少易啲睇得住小朋友
而且佢哋都會玩得開心啲
大比好少去呢啲地方玩
因為佢怕死...怕俾啲波波淹沒佢雙腳
要有人陪佢先夠胆玩
但係我哋大人就算肯陪佢又唔會玩得耐啦
係我哋自己想走先囉
但人哋60個金幣可玩全日
大佬...唔駛你玩足全日
但玩番個幾兩個鐘都叫抵番先
如果要我哋陪玩
半粒鐘已經夠皮收隊
今日fit晒...有朋友仔陪佢
真係可以玩番個幾鐘

玩到差唔多開始人多時
我哋就散水走
跟住就係去一個免費又舒服...又唔會有悶場嘅地方
就係YY屋企啦
YY屋企好勁...勁多玩具
就算全日待係佢屋企
好似係玩具反斗城咁囉
啲玩具玩極都唔完
所以啲細佬冇話會悶而且次次都唔捨得走添

YY媽媽好好客
經常都會邀請啲同學仔朋友仔回家玩
其實如果我有自己嘅地方
我都鐘意請朋友嚟
大人有大人吹吓水
小朋友又有小朋友陪玩得一餐
可惜我暫未有咁嘅本事
努力啦...希望有天可實現
不過我有時都怕怕哋去人哋屋企
始終覺得會打搞到人哋咁
如果有來有往心理上會好伙
你嚟吓我度...我去吓你度
好...努力努力...加油加油
實現個夢想先

坐定定食包包


睇碟有埋小食
呢啲咁照顧周到嘅服務去邊度搵


今日兩位小朋友都好乖
一齊玩一齊分享


滿足嘅一天好快過去


玩到下畫五點鐘
真係要走啦
因為今晚我要煮飯
要去街市買餸
大比就梗係有啲懶皮唔想走啦
兩個小鬼其實都玩到累累哋眼瞓架
但係為咗爭取每分每秒玩樂時間
頂硬上都要

大比一上小巴
就已經呼呼大睡
傻啦...我點會俾佢瞓得咁舒服
到步後叫番醒佢
唔好諗住我咁勇猛可以抱住佢又買埋餸
以前都唔得
而家就梗加唔得啦

見到大比今日玩得咁開心
今日放呢個假都算值得

大比第一個暑假

返埋今日
N班的生活就要結束
開始放暑假了
9月開學
大比就要升K1班啦
佢就梗係冇乜特別感覺
我就覺得...時間過得真快
個女又大過咗囉

呢一年嚟
大比除咗係學校學到基本智識外
最大得著係品格同自理能力都得到好大改善
老人家話咁細個就返學
有啲家長就會話返全日唔忍心好陰公姐
對我嚟講
因為我要返工
冇咁多時間同心機去照顧佢
叫老人家湊或者俾工人姐姐湊
老實講...老人家湊...始終係長輩級...係你媽媽都可以有啲要求...但係如果係99呢...你要求得幾多呢...加上老人家多數會縱同好鍚佢哋...所以品格同自理唔會好得去邊
如果係工人姐姐...你都可以有要求佢哋點去照顧你小朋友...不過始終係工人...又要打理屋企又話要教你小朋友...邊顧到咁多嘢呀
返半日班或playgroup
對我嚟講又係冇意思
所以一開始我只會報讀全日制
好好彩又俾我入到間好學校
就嚟多隻鬼靈精出世
大比而家嘅自理力能足夠我做少好多工夫去照顧佢

至於學術方面
暫時我覺得大比都學得唔錯
起碼佢有興趣先
你話學咗幾多嘢
總之學校教乜就學乜
同其他人比喎
冇咁嘅需要囉
擔心佢學得唔夠
冇乜好擔心
總之日後嘅路由佢自己創造慢慢行出嚟
我只會從旁協助而唔會幫佢鋪路或者催谷佢成為點樣點樣
返學讀書係開心...係有興趣而推動你
我唔想佢覺得會有種無形壓力同威逼感而返學
由大比開學喊到傻
到而家佢係鐘意返學
真係另到我又放心又開心

下學年升高一班啦
雖然唔駛擔心佢要適應學校生活
但都希望佢能夠循序漸進發展良好
亦希望佢繼續開開心心鐘意返學
當係幫我減輕吓負擔啦
因為我又要train另一隻小鬼頭

N1結業了

話咁快...大比就嚟完成N班了
今日學校就舉行結業禮
祝賀一班將要升小一的畢業生外
仲有頒獎俾一班年內有好表現的乖乖叻叻學生
還有就係各級的表演
上次錯過一次大比可以上台表演的機會後
今次一定要出席
一齊高興吓嘛

結業禮係借用一間小學嘅禮堂

典禮十點鐘開始
但我哋要先帶小朋友俾老師作準備
比爸今日長週要返工
所以先返公司交帶好
我就同大比食好早餐再join爸爸

係路上遇到好朋友仔
就一齊手拉手唱住歌行




禮堂門口已堆了好多家長

天氣又熱...大人細路都一身汗
但係啲細路見到朋友仔
熱又駛乜驚...最緊要玩番陣先





呢兩個人仔
有時糖痴豆(好似而家咁攬頭攬頸)
有時水溝油(係學有時會講...今日我唔同你玩呀)


小朋友嘅友誼係最純真嘅

 

 

好啦...終於可以入禮堂...有得涼冷氣啦


因為冇指定坐位...真係入得快就可坐得近

先係回顧吓一年嘅快樂時光


跟住就係一班畢業生上台
唱吓歌...多謝校長一班老師同嬸嬸多年嚟嘅照顧同教導

然後例牌會請校長同嘉賓致吓詞

又有一班小詩歌班唱吓詩歌

大比咁鐘意唱歌
唔知下年有冇機會入詩歌班呢

接住就係各項頌獎禮
好多家長都好期待呢啲歷史性時刻


大比攞到優異獎

 

 

 

講真...佢都唔知係乜嘢一回事
係做家長嘅我哋仲開心

再嚟就充攞親子閱讀嘉許獎






能夠培養到閱讀興趣非常之好
希望大比能keep住落去

頒完所有獎後
就係各級學生嘅表演

我哋第一次欣賞大比演出
好期待...好開心

 

 

好彩大比都表演得唔錯

典禮完咗
就有大食會




同埋老師會派番呢年嚟嘅身心發展及學習報告
以及小朋友係學校所有做過嘅手工習作
如果唔係比爸要返工
我又要去睇醫生
會留係度食嘢...等大比同啲同學仔玩一陣嘅


好有鼓勵性嘅一張獎狀

除了獎狀外
仲有份少少禮物





希望大比可以一直對閱讀書本有興趣啦
係真係一本本嘅書...而唔係電子書囉...hehe~~~

又老一年囉

而家生日...冇以前咁期待會去邊度慶祝...會收到乜嘢生日禮物
只要一家人齊齊整整...開開心心...已經好滿足
其實今年上天已經送咗份大禮俾我啦~~~小豹
以前嘅生日願望都圍住自己想點想點
而家...期望一對仔女健健康康...開開心心就最重要
不過如果有幸俾我發埋達就加更好啦
人始終係會貪心架嘛

是的...今年生日平平淡淡咁過
冇放假...冇安排節目...冇食乜嘢大餐
我冇覺得有失落感
睇你心態如何姐
我仍活著...一家人仍然開開心心...好足夠
如有額外的...就當係自己平時積福所得番嚟嘅Bonus啦

不過我仍會努力爭取好生活...等一家人更開心幸福

在政府照結構

以往政府多人搶床位
醫護人員真係忙到想死
所以有好多檢查都叫你去私家驗分擔吓
陀大比個時我係要去私家度照完結構攞番份報告返政府
照一照就成千八蚊
其實幾肉赤架
但為咗大比安全穩陣起見
你點都要駛呢舊錢

不過而家冇咗雙非
政府唔駛迫爆咁多人
其他醫院好似都話會免費照結構
但廣華都要你預產期係35歲先會免費幫係照
如果唔係都係要出外俾錢照

以為今日又係要等餐死
但原來照結構係好準時架
約你幾點到診就差唔多係個個時間照
所以一定唔可以遲到

雖然係政府照冇私家個啲3D/4D
但醫生一樣會清清楚楚話你聽BB情況係點樣
五官四支體內氣管一一講你知正唔正常
今日可以至確定我真係冇聽錯
係仔嚟...有啫啫囉

大約15分鐘就會照完
聽到一切正常生長穩定
都暫時安心晒
小豹...你要健健康康哦~~~