多久沒回去的鄉下~梧州 D1

請了4天假回鄉...主要目的係拜外婆

其實好慚愧架...生前拖吓一年又一年唔返去探望...到而家死咗才去拜...心頭總係唔舒服...不能帶大比去見一面...呢個實屬遺憾

 

比婆婆同比公公早我哋兩天回去...其實有假期...多玩幾天係好嘅...可借比爸才轉新工...多放幾天都唔知公司鐘唔鐘意...

 

呢日係我哋一家同亞舅一齊回去...係深圳搭9點車...車程約6個鐘...其實都幾係嘢


大比第一次回大陸...就要挑戰坐長途車


好彩呢隻爛瞓比...搭6粒鐘車...佢可以瞓5粒鐘...所以順順利利到達


鄉下地方已漸漸唔鄉下了...繁榮咗好多...高樓大廈都多了不少
比婆婆 ; 比公公 ; 大細舅公 ; 姨公姨婆嚟接我哋車
先回姨公姨婆家放低行李...休息一陣...就去食晚飯...早點食晚飯...因為我哋係車上只係食包...而且唔敢食太飽...如果唔係中途要用大比啲片片就大獲囉

今晚我哋去食乳鴿...近期好出名的
地方都遠離市區...係要揸車去食...都有唔少人嚟...証明一定好食


先嚟個番鴨冬瓜盅...幫清熱氣
呢個冬瓜盅好得意...盎外內都有湯...一路飲就一路將盅外個啲加入去...唔駛驚唔夠飲


清甜好味...睇大比係咁飲唔會有錯


嚟個雞腳小食...好入味...真係連骨都要損埋


主角嚟了...
唔大唔細的乳鴿...味道夠晒...肉質唔乾仲有好多肉汁...一絲絲嘅肉夠嫩口
我同老公一人食咗兩隻...大比就食咗三隻鴿嘅四肢加半邊鴿肉
回港後相信短期內不會食乳鴿...除了味道外...係食唔到咁嫩口嘅新鮮乳鴿


呢碟排骨都只係陪襯品...不過都係好好食


最後呢個煲仔飯~~~豬心
唔好睇到佢白飯一煲...其實已經夠晒味道...不用加豉油架...一粒粒飯軟硬適中...我食完一碗其實已經好飽...但係都係再添多碗...呵呵呵~~~


食飽飽就去放煙花...幾耐冇玩過呢啲玩意


小小的煙花大比都會揸住玩...太大的佢就會開始有點怕


飲飽食醉...又玩完...坐咗一天車...回家早點休息吧!!!
養好精神做明天重要的事情

下篇 D2
http://anbesiu.blogspot.hk/2014/03/d2.html

親子運動日@N1

原本諗住一家都嚟參加運動會...但係比爸請唔到假...所以得番我同大比去參加

想像中嘅運動會...以為係有運動比賽參加...但N班就一定冇...以為會係係看台替啲高班哥哥姐姐打氣...最多可能會有項運動親子一齊參加

點知...原來...錯晒~~~

一早8點半係學校集合...齊人就搭車去深水埗運動場...如果係斧山道個個你話幾咁好...不過不能咁自私嘅...因為唔單止係我哋呢間有份參加...而係成個機構5間幼兒園一齊參加...所以我諗係每年輪流就其中一間幼兒園附近嘅運動場...這樣才公平嘛~~~

遊戲卷~~~點解運動會會有遊戲卷...所以我咪就係話錯晒...運動會...不是比賽...只係有攤位遊戲玩...每個小朋友都有機會放電...志在大家開心...不過呢...細路去放電...咪即係我哋做家長都要放電囉...而且仲要比細路付出double以上添...未出發...已滴汗


到會場後...先嚟個集體做早操...""做運動呀身體好""
原本係小朋友就企前面...家長就企後面...大家一齊聽住音樂做早操


開始排位時大比都OK嘅...點知排排吓...佢開始要痴住我...唔肯俾我行番去後面...一行開就大喊...唉~~~冇鬼用架...人人都聽音樂做早操...又唱又跳...大比呢啲唔係你愛好嘅活動咩...痴住我托咩~~~所以最終差不多就嚟完大比先進入狀態唱唱跳跳...但人哋已經收工啦

不過咁多小朋友...高班嘅都易啲控制...好似呢啲N班嘅豆丁...唉~~~某程度上場面係有點混亂嘅

做完早操就上看台...睇唯一有得比賽嘅項目...啦啦隊表演
原來老師有邀請我去出席...因為開頭我報名係有我~比爸同大比一齊...咁有多個家長的話...就被邀請參加啦啦隊表演...而另一位家長就睇住小朋友...但可惜比爸請不到假...無緣參加...原本覺得有點可惜...但後尾得知家長被邀請唔代表可以同埋小朋友一齊出去跳...N班小朋友始終仲係細...所以要佢哋表演始終有難度...噢~~~不是同大比一齊跳...咁參加唔到都冇所謂囉...下年等大比大啲再睇吓仲有冇得玩

幾間幼兒園輪住嚟表演


到我哋安強了


下面在表演...我哋就係台上助慶...每人兩支捧捧...加油加油加油


咁多間幼兒園表演完...跟住就係攤位遊戲開始


一埋積木...一埋木塊...切切切
一大班小朋友...其實冇意思...你切完...轉頭又俾人搬走
而且木塊真的不合N班的小朋友玩...一不小心就會俾高班的拍頭...拍手...甚至仆底...大比咪就係三樣都中晒
小朋友一有得玩好難會有理智...所以我眼見咁混亂...叫大比玩過其他嘢好


原本排住隊等玩滑梯...不過係坐住個盆滑過啲碌碌...大比話驚喎...所以冇玩到
佢走去波波池...本來我唔太想俾佢玩...因為又係好多人撞嚟撞去...波波池係小朋友入...大人只係周圍...所以佢哋呢啲豆丁有乜差池...我哋做家長遠水好難救近火喎!!!
後尾見到情況有改善...一批玩完到另一批...大比又真係好想玩...我先俾佢玩


玩玩吓大比突然話要搵埋YY一齊去玩...就係咁...之後就同YY一齊再戰其他攤位遊戲

拋波波...唔俾個波波跌落地...但係呢個條柚仔...成日去偷走個波


玩紙皮...識唔識玩都好...睇到佢哋已經覺得好搞笑


呢個遊戲...佢哋係唔識玩...雖然有教佢哋都大約知點玩...不過始終唔係好識發力


人哋係執海棉塞入條柱...塞到一定數量就等啲充氣嘅風跳開條柱爆番啲海棉出嚟...但係佢兩個唔知係唔係平時慣咗幫老師收拾用具...佢哋係度執海棉多過去玩囉!!!哈哈~~~


之後就走去探新嚟嘅老師~~~Miss Wong嘅主理攤位...順便影張靚相先


佢哋覺得麻麻哋好玩...去埋個大豆袋區...唔知係唔係玩到攰攰哋啦...所以佢哋覺得係上面瞓嚟瞓去好舒服...連人哋話要收檔呢隻嘢都唔肯走


時間夠...就拎住張印咗印仔嘅遊戲卷去番自己間學校換份小禮物
原來諗住家長去換...點知原本一定要小朋友去換
換嘅時間要講~~~
"何老師我嚟換禮物"
何老師會問~~~"你要乜嘢色"
小朋友要答乜色架
"藍色" ~~~ "黃色"
好彩大比都識答
最後就係要講句~~~"多謝何老師" "唔該陳主任"






玩到身水身汗...休息一陣...攤位執好後...就頒獎...公佈啦啦隊表演冠亞軍
未開始前...小朋友去買點嘢食...買嘢飲




呢兩個小朋友係度做乜...之後YY同大家分享食物...而家佢見到大比食雪糕...以為又有得分享...大比都好樂意俾YY食...不過呢衛生問題...唔係好似之前啲魚仔餅咁可以分享到...所以呢YY就有點失落...大比亦有點無奈


原本YY媽媽叫YY同大比合照...點知大比居然指明要同YY媽媽影相...噢~~~唔止YY媽媽驚訝...我亦覺得"估你唔到"喎!!!(原來...我影埋諾諾添...咁啱佢又對住鏡頭笑...哈哈)


呢四個小朋友...見到佢哋聚埋一齊...唔知佢哋之間又有何感覺呢...我就見到"緣份"呢個個字




胡老師雖然唔係教N班...但大比常常都係遲放學...放學後成日都會遇到胡老師...大比都好鐘意同佢一齊玩...好鬼馬...不止有份師生關係...仲好似朋友咁friend添


廖老師都不是教N班...但同大比都熟悉...其實基本上大比個個老師都熟...只係有啲大比真係當咗朋友咁friend底...有啲就存在對老師嘅敬意


四大天王最後同陳主任...兩位班主任~~~黃老師& Miss Wong...同埋林校長一齊影番張相


散會...去食lunch囉!!!家長亦鬆了一啖氣


大家食飽都係會返歸...所以不如就返番鑽石山先食lunch啦...呢頭工廠區...又遇上食飯時間...等得嚟...返去食得舒服仲好


其實大人細路都好攰架啦...醫飽個肚各自歸家唞唞
大比一上車就已經瞓著...哎呀~~~唔好瞓先呀...仲未沖涼架!!!


沖好個靚涼...兩母女大覺瞓...多麼的爽呀!!!

又到借庫時

已經忘記了借咗幾多年囉！時間唔短，但又唔係話借咗好長時間。不過有樣肯定嘅，只要我仲行得走得，都會一直有借有還。

 

上年因為去日本旅行，安排日子失當，所以唔可以親自借，雖然托咗人借，但感覺總係爭啲。比爸自從識咗我後，都跟我借庫保平安，年年都係我幫佢借，不過今年我同佢講，可以的話，始終還是親自去比較好。

 

今年真係好多人，我從未試過會排成咁，乜經濟差咗咩？

 

排咗個幾鐘終於借到，無論金額多少，只要借到我已經安心，還是自己去借嘅感覺最好。

 

比爸係第一年親自去借，佢話抽金額時，佢諗住多摸幾張，但有張牌卡住佢隻手，似乎冥冥之中已幫佢選定咗，唔好三心兩意啦！

 

雖然話金額多少唔緊要，不過望見比往年多，心頭總係開心嘅，期求心願能達到，不過達不到，能平平安安，順順利利渡過，已經係一大福氣。

大比第一次的家長會

話咁快大比已返學完成上學期了，學校有個家長會，作個小小總結。

 

基本上，平時接大比放學時，如老師得閒，都會傾講過大比在校嘅情況。但平時比爸少之有少會聽到，所以今次我堅持比爸一定要去，有乜問題，自己同老師直接問個明白。

 

係學術上，我暫時冇乜期望大比一定要學到啲乜，所以只要老師唔係話佢有學習障礙，我已冇乜好擔心。英文，普通話，雖然老師話佢讀音仲未好正，但基本上佢都跟到進度，講一兩次已經明白。而且大比好鐘意睇書，有自由活動時間，就去圖書閣睇書多過玩玩具。有呢啲結論，我已經很開心了，老師叫我哋keep住培養落去，因為個start已開得好好。

 

另外老師話大比好鍾意唱歌，啲歌聽兩三次就已經可以上話，咁佢始終咬字唔正，所以雖然唔知佢唱乜，但啲音就唱得幾準，會知道佢唱乜歌。既然大比似乎有呢啲天份，大啲就俾佢去學吓音樂，睇下佢是否真的有興趣。

 

我現階段最關心嘅始終係自理同品德。讀書雖然要努力，但總有帶點天份。但自理同品德，從小唔培養，一天一天的長大，就會越難改善，所謂三歲定八十都不無道理。

 

自理方面，老師說大比做得唔錯，換鞋去廁所食飯都有規律亦自己搞掂，平時我都會將覺得大比能力會做到嘅事由佢自己先做，到佢嘗試過真係唔得我才會出手幫助。老師還讚會除了自理能力好，還會主動幫老師手，我覺得好恩惠。

 

不過情緒方面，還要加把勁，禮貌同情感都仲未控制得好，唔高興就唔睬人，易喊又易發脾氣。真的要好好教導，我唔想要個公主病嘅女。

 

學校準備的box file，會紀錄晒小朋友嘅成養學習過程，除了等家長多啲了解，仲係將來見小學用。所以基本上，如果個小朋友唔係到極點，老師們都唔會點寫花本簿嘅。

 

大體上我都好滿意大比嘅表現，咁更係仲有好多地方可以改進同進步。不過見到佢能夠開心咁成長，始終我覺得最重要，將來係點，我信命運自有安排。應做的我一定會做，但太強迫性盡量避免。

一粒棉花糖 + 一樽司各脫

一粒棉花糖~~~
而家每朝返學...入學校前我都會將一粒棉花糖放係大比衫袋中
同佢講如果今日冇喊...放學時老師有讚你今日返學乖乖
咁呢粒棉花糖係媽媽接放學時就當作獎勵
雖然我唔讚成有食糖果習慣...但呢粒棉花糖係確實有點用途
而家大比每天入學校都好開心...唔會再唔捨得媽咪喊到鬼殺咁嘈
會精精神神叫老師早晨...又笑晒口...拍好卡後...就同我講bye bye
咁乖...一粒細棉花糖就少意思啦!!!又唔係俾得多

一樽司各脫~~~
呢樽司各脫唔係我買...係比婆婆有天去打流感針...診所姑娘俾咗兩支佢
叫佢俾個孫食...話應該好好嘅...因為醫生長期都一箱箱訂俾佢啲孫食
唔好的話...又點會長期食呢
起初我都半信半疑係唔係咁好...不過免費嘢...連醫生都信...食咗先啦
之前大比一直都反反覆覆病...好咗無耐又會俾同學仔感染過
中西藥好似都未停過轉流食咁
但自從食咗司各脫...唔知係咁啱得咁Q...定係真係work
暫時大比係強壯咗咁...之前斷極都斷唔到尾嘅傷風感冒冇咗
呢排天氣反常都驚佢會中招...好彩又過到骨
雖然我都不能太老定...都時刻要注意提防
但司各脫應該有番一定作用嘅
所以我諗住長時間都keep住俾佢食啦
橫掂我定期都俾保嬰丸佢食...但保嬰丸難入口嘛
呢隻係橙味...又甜...叫佢食易好多

兩個孖寶...一個俾到快樂...一個俾到健康...幾咁美好呀!!!

中西情人節快樂

今天既是西方情人節亦係中國元宵節...一個情人節好還是雙重情人節好...其實影響唔係太大...多數人都係會著重西方情人節多啲

 

琴晚99好有心...同我&比爸講...今晚佢湊大比...我哋出去relex吓

99好意心領啦!!!一嚟出街去邊祝慶祝呢...啲嘢實在貴得不值...二嚟大比又點肯咁順攤跟亞麻呢

好快...99問大比話今晚跟麻麻好唔好...大比好不俾面答~~~唔好

仲好快話我跟媽媽就得啦!!!

哈哈~~~想撇甩大比...我諗要等到佢撇甩我先才會有機會啦!!!

 

雖然話出面啲慶祝活動不值...但都渴望想過一過節...不過比爸係個現實的人...講句~~~一齊快樂的話...唔在乎呢啲世俗慶祝...日日都可以係情人節~~~

挑~~~所以呢...面對現實吧!!!

 

冇希望就唔會有失望...只要我個小情人大比開心就OK啦!!!

不過仍會期待有例外有驚喜嘅

 

祝大家天天都是情人節...快快樂樂...幸福開心~~~

放了長假後的開學第一天

要返學啦！大比終於開學了...比爸話...湊完佢一日每天只剩半條人命

放咗咁多日假...唔好話我哋返工都唔願...小朋友就梗加極度唔想返學添
叫咗半粒鐘大比都唔肯起身...唯有瞓著覺都同佢換校服
換完佢醒咗...不過就黑晒面企係房門口...大佬...你黑面都係要返學...正如我哋黑面也要返工嘛!!!

比爸明天才正式開工大吉...所以今日都仲可以送佢返學
預咗佢會喊架啦!!!實唔肯入學校...但係冇計...你都係要返學
其他小朋友情況都唔係太樂觀...黑面冇表情已經叫好好...有啲到學校樓下已經擺晒陣叫囂唔肯返學...媽媽也無奈同佢鬥企拉鋸戰

都估到大比會喊多兼扭計...所以今日我都早啲放工同埋比爸準時去湊佢放學
接佢放學前去買咗啲禮物仔...當係鼓勵大比...明天返學唔好再喊啦!!!

係灣仔玩具街買了一架巧虎車車

出尖咀買了呢個沖涼玩的泡泡機


仲買了米奇餅同朱古力棉花糖...呢啲全部都係大比極愛嘅嘢

點知話準時4點半去接...我哋兩公婆4點幾到咗荷里活...諗住仲有時間不如行IT一圈先上去...呵呵~~~呢一圈...就圈咗半個鐘有多...兩公婆買衫又試衫...唔好再睇啦...去接大比放學啦!!!

因為5點半前接放學可以入學校...我第一時間入去睇吓大比有乜新作品...平時好少機會睇到
今期佢哋玩設計呀


見到大比啦~~~oh~~~喊到口腫面腫...老師話佢喊咗成朝...到下午就慢慢平服番...朝早扭起計時...要指定老師帶去廁所...唔係的話寧願賴落褲都唔肯去...野蠻人呀!!!伙

係時候出百寶出嚟...同大比講...要乖乖...唔好喊...老師話晞汶下午乖咗...所以爸爸媽媽買咗啲小禮物...獎勵你

大比見到有得食又有得完...爸爸媽媽又齊晒嚟接放學...沿路返屋企都係開心到爆燈

返到屋企見到埋巧虎車車同泡泡機...梗加開心到暈


希望明天佢返學...會順利好多啦!!!
亦希望明天比爸開工大吉...順順利利~~~

這個馬年就咁過

年三十晚放半day...老公湊咗大比就嚟join埋我放工...先去太子醫飽個肚...整個lunch先...唔係一陣點行花市

原本諗住去一間冰室食...但門口排咗好長龍...而且入而間隔細...我哋又帶住BB車...所以都係放棄...是旦搵間茶記就算...茶記都要差不多200蚊埋單...而家啲嘢食真係貴到飛起

 

食飽飽就出發去行旺角花市...時間尚早...未算好多人...不過就曬到傻咗...好熱

 

行呢個花市...大比如願買到恐龍氣球

 

 

旺角花市雖小...買嘅產品款色唔多...不過覺得佢哋啲質素好過維園嘅...個次去維園買了毛毛嘅帽...點知返到屋企試係帶唔穩嘅...一帶就滑落嚟...而且仲爆埋線...質素何其差

除咗大比有收獲...我都買了盆發財樹...希望今年發財發財

 

行完個花市...大比一上番車仔...好快就瞓了

之後我哋就出尖咀...去我御用入貨區找埋尾數攞埋啲衫...唔好澤過年嘛

 

出完尖咀再去銅鑼灣維園...哈哈哈...又去...貪今日夠迫

其實我哋唔係行...只係去峰峰學生會個個攤位算吓命...順便做吓善事...點知個攤位成六點幾都唔開...都唔知佢哋會幾點開...比爸有諗住等到7點幾再嚟過...不過我哋眼見維園越嚟越多人...都唔知點迫番入去好...而且又唔確定7點幾一定有人開...所以算吧...冇緣吧...下年再嚟碰過運氣

 

走啦走啦...越夜越多人...我哋都係適合回家舒舒服服等過新年

 

***** ***** ***** ***** ***** *****

每逢大年初一...都係會同比爸呢邊啲親戚飲餐茶拜年...然後就睇場戲...晚上回家食飯當開年

 

大年初一搵地方飲茶都幾麻煩...一係冇得book位...就算有得book都會限你時間幾點多可以book...今年我哋去一間少人知嘅稻香...可以book幾時都得

 

每逢大年初一去稻香飲茶或食飯...一定會有一個十元硬幣回贈...當係利是...亦當係免你茶位咁

 

以往新年睇戲...係唔駛買定飛...因為華懋戲院一定有飛賣...可惜執咗啦...今年睇戲就一定要買預售...唔係...你唔駛指望有得睇

 

今年想睇嘅戲選擇唔多...睇金雞...但啲細路唔啱...睇每年都會有新年氣氛嘅電影"六福喜事"...我哋覺得麻麻...除了"大鬧天宮"...啱小朋友之餘又有卡士搭夠...就睇呢套...不過唔想睇3D...啲場次好少選擇...公平啲啦...3D同2D都平衡啲...唔好成日掛住賺錢狂谷3D場次

 

今次只係得我...比爸...大比...大細表姊同埋99去睇...係99爆冷會睇戲...佢話因為卡士勁睇明星咋

 

 

因為成差唔多6點先開場...點飲茶都捱唔到呢個時間...我哋一家就同細姑媽一家係荷里活商場hea住等...其餘的就回家唞唞到時再join

 

 

今晚晚餐又係盆菜...一嚟麻麻哋盆菜...二嚟團年才食完...隔一星期又食...真係有啲怕...所以比爸提議叫我去炒飯...琴晚食完五香肉丁炒飯...今晚試吓回鍋肉炒飯...都係五香肉丁炒飯最好食

 

***** ***** ***** ***** ***** *****

 

年初二係我哋拜車公的日子...以往係拜完車公就去細姑媽屋企拜年...但今年佢哋去旅行...就算唔去旅行我哋都唔方便去拜年...因為我帶孝中...所以今年拜完車公...就行吓街然後回比婆婆家食飯...當是返外家拜年同埋食開年飯

 

***** ***** ***** ***** ***** *****

 

年初三比爸就去打war game...而我例牌實返比婆婆度...初三跑馬...比公公一定放假...原本比爸唔係去打war game的話...會入場行番個圈嘅...不過入唔入都唔緊要...咁多人...要買馬仔...在家買仲好

 

***** ***** ***** ***** ***** *****

 

因為今年年初三係星期日...所以年初四還可以放假...算多日假期...今日就去拜黃大仙...大年初一我哋去咗架...不過實在大多人...又要係烈日當空曬住等入場...又唔知等到幾時...所以拖到今日才去...話我哋拜咁多神...哎呀!!!拜得神多自有神庇佑嘛!!!

 

拜完神就去求籤...然後解籤...今年我哋轉過另一位師父...以往睇開個個覺得麻麻...見呢個成日都有咁多人等...一定有啲料到

哇!!!一等就等了二個幾鐘...其實只係等三家人解籤...不過第一家人要解三十幾支籤...大家族...第二家人都唔弱...都要解二十幾支籤...我哋對上個家好啲...解五支姐...咁大家族都搵佢解...衰極有個限啦!!!

 

以往我會睇埋流年...但呢個要收千五(本來話加了價二千...但話係人介紹嚟...可收番舊價)...千五喎要諗過先...以往睇開都係400至500...唔通個啲真係"流"年

 

呢個師父講啲嘢都好中...雖然我哋求嘅籤都係中上籤...今年運程都唔會差得去邊...不過對埋個時辰八字...我同比爸都係運滯個批...大運未到...為有搵啲嘢化解得幾多得幾多...做多啲善事等第時行運會更好

 

解完籤都已經差唔多黃昏了...原本諗住去邊度邊度行街...咁晏...都唔想周圍去...近近哋去樂富商場行吓...順便諗吓今晚食乜買埋

 

***** ***** ***** ***** ***** *****

 

無無聊耶就過完個新年...明天要開工大吉啦~~~

 

呢個係比爸亞姨封給我哋的利是...好有心機...唔捨得用...所以我將佢整成立體揮春...哈哈哈

 

另一個是換新銀字時越到的靚No...所以都留起唔用