大比第一次冰上行

之前大比個姑媽朋友俾咗溜冰鞋大比
所以襯對鞋大比仲啱著
就帶佢去溜吓冰
亦順隨等大比試吓鐘唔鐘意玩
如果有興趣
可以考慮吓俾佢學

因為圓方冰場有得推住企鵝仔學溜冰
亦諗住可能會冇咁多人
就約埋大表姐一齊去玩

比爸係唔識溜
而我都因為太多年冇溜都唔識得點溜
但最終都要由我帶住大比去玩
比爸話我始終有玩過會好啲嘅

其實我都驚滑到一仆一碌架
不過好彩有個企鵝仔頂住
冰上行都OK嘅

圓方冰場係一蚊一分鐘計
用八達通出入計數俾錢
而租鞋就20蚊對
另外租企鵝就100蚊2個鐘另收100按金
最少都要租2粒鐘





其實我同大比唔係玩咗好耐
可能大比開始有啲眼瞓
玩咗十幾分鐘
行咗三分二個圈就叫走
以為佢唔鐘意玩
但問佢下次仲玩唔玩佢又話玩
不過因為越晏越多人(差不多三點)
所以見大比都唔玩
人又多
下次再嚟過
我都"行"到好攰
梗係啦...我要彎住條腰架

大比學校觀課日

大比學校一連三日的觀課日
我係last day個日睇
之前兩日已大約從其他家長口中得知大繼情況
而且仲有一件喜出望外之事
就係好多家長...老師...甚至連校長都讚大比
話佢好精靈...唱歌跳舞叻之外
仲好似乜都識咁
總之就係好活躍好醒神啦
我都好多謝大家咁睇得起大比

今日到我觀課
大比見到我梗係開心
不過都冇失控到
同平常上堂一樣咁

佢真係多嘢講...多反應...多動作
總之就係活躍分子
我見到佢上堂咁開心
又識到咁多嘢
我都好開心

睇到佢上唱遊堂...分組活動堂...同英文堂
都大約了解到佢上堂嘅模式
我覺得老師同上堂嘅氣氛都好好
證明我冇揀錯學校俾大比

睇咗一個半鐘頭嘅上堂情況
之後就去咗校長室同校長同埋老師討論一吓剛剛上堂情況同俾啲意見
好多家長都覺得個小朋友學校同屋企係兩個樣
學校自然乖啲
屋企就原形筆露
但大比呢
學校同屋企差不多
都係咁跳皮...哈哈~~~

搞笑實錄~~~

當大比排隊等去廁所時...佢驚轉個頭出嚟唔見到我...就對住校長講 :
""你唔好俾佢(手指指住我)走呀...知唔知?!""
亞女...校長嚟架...有啲禮貌啦...落order口吻...真係冇眼睇

當大比識嘅嘢時...佢一定講得最大聲最清楚個個
但當大比唔多確定個樣嘢時...就會有表情有口型...但冇聲
不過當有人講咗"答案"出嚟時...佢就第一個執死雞...講得又大聲又準
估惑妹

上英文堂時...老師未教到佢(學生字時會一對一咁教)
佢不單止坐姿ugly...同係屋企冇分別
而且仲打埋喊路...好大聲個隻
真係失禮街坊囉...黃老師見到佢咁...都忍唔住講句 :
亞女...斯文啲啦~~~

最遺憾係今日冇得影相...之前兩日啲家長都有影相時間
但係今日就冇...唯有等睇學校影咗個啲啦~~~

地獄廚神 X 大比生日會

今日邀請咗表哥表姐一齊嚟同大比食餐生日飯
原本諗住叫外賣
但食嚟食去唔係壽司就係pizza
我話如果唔怕嘅不如我煮
哈哈哈
亦有提議過
叫比婆婆煮好
我去比婆婆屋企攞返嚟
不過算啦
又唔係煮勁嘢
是是旦旦未算

全部都係第一次煮
所以唔好諗住好食


大蝦蟹肉蟹子青瓜生菜沙律
呢樣係全部餸最好
因為冇乜難度
只要啲蝦正就得
我用咗越南虎蝦~煎香


一蝦兩食
係比婆婆度
我哋個個都唔食蝦頭
所以就會用嚟整湯煮伊麵
但係比爸爸就鐘意食
尤其係炸
不過有點失敗係~冇乜味...因為我忘記落少少鹽醃...好彩最後有華鹽幫手


咖哩蘿白魚旦墨魚蘇
啲咖哩汁可撈通粉撈麵食都得


瑞士汁雞翼~唔夠"傑"同唔夠甜


雞肉串燒配花生醬


生菜包~食食吓我才發覺唔記落炒米


忌廉雞脾菇腸仔汁通粉~個汁唔記得影相


最後就係噴火龍雪糕蛋糕~天熱漸熱...食雪糕蛋糕就最正

給小朋友買份醫療保有需要嗎?!

其實而家每個有小朋友的家庭
只要負擔到
多多少少都會幫小朋友買一份醫療保
買時你會懷疑駛唔駛買
需要咩???
我都有儲蓄啦...有需要每月俾錢保險公司幫我買呢個保障

講真...我都希望用唔著
用唔著即係你小朋友身體健康
但係呢
而家個生活環境
大大小小嘅病菌
係啲菌惡咗
定係我哋身體弱咗
好難講
大人一點少病少痛都仲話可以捱吓
但小朋友呢
真係搏唔過
尤其一關係到發燒
十個入嚟醫院九個都係同發燒有關
啲床位永冇吉位
走咗一個又緊接一個入嚟
真係冇買到保險
而經濟唔許可
政府醫院要等服務冇咁好就要局揀
因為一入私家醫院真係唔講得少
但有買到都要睇吓你買個份"份量"如何
如果當初係抱住"象徵式"買咗嘅心態
咁隨時你都要有心理準備自己都要付出唔少

大比好好彩
家庭環境尚算許可
而且又有一個有經驗嘅保險經紀
(買有關小朋友保險的...都係搵番個有小朋友的保險經紀...佢哋會想得周到同俾到適合嘅意見)
當初買到一份算係可以保障足夠嘅醫療保

好似今次咁樣入一入院
住咗四晚
房費 ; 醫生費 ; 各種檢查費 ; 藥物費 ; 治療費 ; 雜費 ; 餐費
大約用咗$18400~~~
幾貴吓架
如果冇保險突然要洗呢筆錢
都唔好話唔肉痛
住得私家
就預咗乜都要錢
好多嘢都要檢查走唔甩
用嘅藥物又係貴
普通傷風感冒藥就梗係唔貴
但留得醫
剩係抗生素都講緊千千聲
仲要成個療程計
唔係話一兩次就搞掂
每天都係燒緊錢
所以你份保障冇番咁上吓
都唔好咁老定

今次就算大比份單claim唔十足
但都唔駛付出太多
就算要俾都係平時睇醫生費咁
算叫好彩

有小朋友嘅你
冇買的不防考慮吓買
就算買咗都要睇吓保障夠唔夠
我99話齋
一個月買少件衫豪少一餐食
都要買呢份保險
唔好成日諗住益咗保險公司
咁真係最終益咗
我恭喜你...因為你真係健健康康
但真係要用時
起碼煩少一樣少份旁惶

健康的感覺真好

今天可以出院了
兩隻嘢琴晚瞓得好
一早就打嚟叫我快啲買早餐過嚟
好好好
去麥記買好早餐就過去
食飽飽等醫生嚟巡房
一切OK就走得囉

好多人都想襯冇乜事出到院
享受埋餘下兩日假期
見姑娘遲遲都未俾文件我哋搞出院
以為醫生唔通忘記咗通知
原來唔係
真係好多人出院呀
同我哋想法一樣囉
所以姑娘話出院比平時多一倍時間
等唔緊要
最重要有得走

出院後第一時間就同大比去買kitty廚房
生日禮物
最緊要健健康康
真係冇乜嘢緊要過呢樣
而家啲病菌好勁
出院一個轉個頭又緊接一個入嚟
個個都係發燒
大比因為大啲
算叫有啲嘢明白
眼見其他歲幾甚至幾個月個啲BB
要只用喊表達痛苦
做家長嘅就更辛苦
一嚟煩二嚟又冇辦法幫輕吓佢哋
健康你話幾咁寶貴

買完個廚房 
比爸就返屋企砌好佢

 

大比幾開心

地獄廚神誕生

小氣的生日

第一晚係醫院過
開頭好精神
始終有啲唔慣
但人總會攰
就自然瞓得著
不過因為姑娘都會照巡房探熱同叫食藥
所以其實不能一覺瞓天光
瞓吓醒吓
心諗~最多捱多晚姐...頂住

瞓唔著就煲吓之前未睇嘅劇集


第二天
郁媽嚟探我哋
順便拎張claim form(保險)
呢樣對比爸嚟講好重要...哈哈哈

大比好愛呢隻kitty錶
多謝晒


生日係醫院過冇計
好彩都有份禮物收吓冇咁慘

醫生嚟巡房
部份報告出咗
都冇乜大問題
點解會突然抽筋暈咗
醫生暫時只可以解釋~因突然高燒...搞亂咗腦電波...所以就會有咁嘅現象出現
既然冇乜大外
只要今晚順利過渡
明天有望出院

第二晚九點幾瞓著咗
十點幾俾姑娘叫我起身餵食藥
點知...半夜三點左右
姑娘又叫醒我
話佢又燒到39點幾度要塞肛
吓~~~點解會咁架
搞咗一輪
我呆呆睇住大比
雖然佢有照瞓番
但我要戒備
睇吓佢又會唔會抽筋定其他嘢
折騰到四點半
見冇乜事又去瞓番
唉~~~5點九又俾姑娘叫咗起身話大比已經退燒
退燒好...轉個身又瞓
但係瞓了一個鐘又要起身
因為七點要收床
哇~~~好精神虐待囉

今天繼續守候大比
其實佢個人就冇乜事啦
只係食咗藥有啲呆滯
但精神同食慾都唔錯
只要唔好再番燒就得

到咗下午
抱住大比瞓瞓吓
我feel到佢好熱
唔通又燒
點知姑娘嚟量
真係又番燒
即刻想到...明天出院又無望

今次醫生就建議照埋肺片
表面睇個肺冇花
但唔知裡面嘅小氣管有冇事
因為佢除咗番燒外
啲傷風感冒好似嚴重番
仲要食埋抗生素添

因為明天就開始放復活節假
所以今晚由比爸當值
好等我回家瞓番一覺安穩
我feel到自己有啲開始作病

瞓醒一覺個人精神好多
始終唔駛瞓瞓吓俾人叫醒係唔同啲
8點起身
執好啲嘢...買點心
就去醫院搵佢哋
大比精神好好
比爸都話佢自己精神好好
梗係啦
最辛苦個兩日我已經頂咗
比爸話放假浪費晒
要係呢度過
冇計架
唯有望吓明天可否出得院
住埋今晚好啦
下午醫生嚟巡房
所有報告出晒
大問題冇...小問題啦
氣管發炎...所以會番燒
除咗打抗生素...仲要打埋類固醇
醫生話只要今晚冇事
明天就可以出院
比爸繼續努力頂多晚

係醫院真係好悶
唔駛掉住鹽水都可以自由啲


大比話明天一定要匆出醫院


 

真的嚇到了

大比就快三歲了

都冇諗住同佢搞啲乜嘢慶生活動

諗住買個Kitty廚房俾佢

嚟緊個星期日就叫埋表哥表姐嚟食個生日餐就算

 

點知... ... ...

琴晚大比發燒

都俾咗退燒藥佢食

之後就好似冇乜嘢

其實呢次發燒係我預期之內

因為剛過去星期日

我哋去將軍O拜山

咁好彩好天到不得了

又熱又曬

大比來回行了個半鐘

行到身水身汗

叫佢坐BB車佢就要懶叻行

大比有樣衰係

佢一出汗就係個頭勁濕

真係好似人哋倒咗盆水係佢個頭咁

之前學校運動會佢又係咁

之後就發燒

但個次發燒退了就冇事

所以我估佢今次都係咁

點知... ... ...

我朝早都遲咗送大比返學
因為我想睇吓佢仲有冇事
見佢精神唔錯
又冇再燒
就俾佢返學啦
通知咗老師佢有乜事
如果真係唔掂
到時再接佢

直到我放工
老師都冇打嚟
應該OK啦
搭地鐵中老師就打嚟
話佢突然燒到39度
冰敷後就已經慢慢降溫
不過都建議我接佢放學後帶佢睇一睇醫生好

我接大比放學時
冇燒...係個人有啲攰
仲打電話俾比爸
而家又冇燒啦
咁睇唔睇醫生好
定係返屋企食藥再睇吓點先
比爸話都係而家去睇
廢時又半夜去睇又貴幾倍價錢
好啦~照舊去法國醫院睇門診

哇~~~多人到呢
呢排真係好多人病
老老嫩嫩後生嘅乜都有
唉!!!又唔知要等幾多個鐘啦

等緊睇醫生中
大比都仲跳吓跳吓
我睇緊電話
突然大比個頭中向我菠羅蓋然後碌落地
我仲話大比做乜咁唔小心
一手拎住電話就一手扶起佢
扶第一次佢未起得身
我再扶第二次
佢都仲係冇力起身
但一個轉身後
我就開始驚啦
原來大比全身冇力
雙眼放大反白
只有見到棚牙用力口緊
我第一時間就用食指俾佢咬住
因為我唔知發生乜事
驚佢會咬親條脷
然後就叫等緊睇醫生嘅人幫叫醫生出嚟
醫生見到咁樣
就即刻叫我抱佢去治療室
講真...個一刻...我雙手冇力
你話嚇傻咗好...乜都好
我真係反應唔到過嚟
姑娘就幫手抱大比去治療室
醫生就同佢急救
我唔知發生乜事
只有拿拿聲叫比爸快啲嚟醫院
雖然我都保持冷靜
但feel到個人都有啲震

望住個治療室
大比仲係冇反應
已經由嚇親變到好擔心
唔知點呢
好彩幾分鐘後
醫生出嚟同我講
塞咗肛後漸漸有番知覺
俾佢瞓吓先
建議要留院觀察
想政府定呢度定係轉其他醫院
唔好煩啦
就呢度...不過呢...唔係你想就有床位
最後好彩都有床位
唔駛頻頻博博囉

因為呢啲事係第一次發生
辦入院手續
通知家人又通知學校
我仲係feel到個人未定落嚟
因為講嘢事仲有啲口震
講真...平時成日都話有乜突發事發生要保持冷靜
然後就點樣點樣
但講得突發
你真係反應唔切
個腦一片空白
就算唔空白
好自然會諗到啲唔好嘢
仲俾自己嚇多幾錢重

準備等俾入院訂金
姑娘打俾我大比醒咗搵媽咪
叫我陪佢上咗房先再去俾錢
大比醒番見唔到我
就梗係更驚啦
上咗房比爸即到咗
叫佢辦埋啲手續
安頓咗後
大比心情亦平伏番
叫比爸睇住佢先
我返屋企執啲嘢...沖個涼...買晚餐
預備好今晚要隨時戒備

就嚟生日搞啲咁嘅嘢
唉~~~ ~~~ ~~~

 

 

乾洗乾到一肚氣

差不多轉季了...就算你唔收埋晒啲冬天衫...但大褸厚褸應該可以收埋啦!!!咁又係時候拎啲衫去乾洗

今日消委會先講緊...話近年接到唔少投訴...關於洗衣鋪洗爛洗壞甚至洗失客人嘅衣服
唔知你哋有冇試過...我哋呢一家...就三樣都試齊晒
 
前年有間叫"Bo"(請轉番做中文字)發洗衣店...就洗爛咗比爸件羽絨褸
開頭佢哋死口都唔認係佢哋洗爛
話個扣唔知點解會爛咗...唔知點解都夠胆死講得出
搵櫃面啲亞姐理論...又話同佢哋講冇用...佢哋只係打工
咁搵個話得事嘅人出嚟啦
一係老點你話聽日會係鋪...一係就話搵唔到負責人
好啦...既然你要話玩...就陪你玩
因為差不多日日都去嘈...加上上網留意到
呢間嘢其實都幾多分店
而且呢...亦成日洗壞洗爛啲客嘅衫
又成日死口唔認數...一就賠番洗衫價或者係洗衫價嘅幾倍價錢(唔記得幾多倍~四/五倍掛)
總之就極之唔合理...兼冇悔意係佢哋做錯
所以最後橫掂我已損失咗
就陪你玩一玩
已警告過會去信消委會投訴...亦會告知傳媒你哋幾咁不良
開頭佢哋一啲都唔驚...咪大隻講話...你寫囉...佢哋冇錯洗乜驚
好...就寫
寫信去消委會先...由消委會出面傾...如果佢哋繼續態度冇改善
就通知埋傳媒...報導出嚟等其他人唔好再幫親
我哋都諗住會玩一段時間
點知過幾日...間鋪話會幫我哋搞掂件褸
好就睇吓佢點搞掂
唔知佢用乜方法...真係整番好個扣
比爸話佢就算落番shop(dsquared2)...人哋都未必配得番個扣俾你
不過唔理點都好...總之件褸搞番好...話之你
但係經我哋咁樣一嘈...名顯佢係流失咗好多客
幾個月之後仲執埋添~~~
 
上年比爸又去乾洗...咁梗係唔係個間
點知洗咗幾次都冇問題
上年冬天時諗住攞番啲褸冬天著(而家咪成日都話免費存倉嘅)
唔見咗一年D&G羽絨背心
開頭間鋪問我哋係唔係有存呢件褸
咪玩啦...你張單有寫明架
因為間鋪係負責接貨...會拎去另一間洗衣工場洗及代存
咁即係個間工場整唔見啦
話俾時間佢哋搵...冇問題...最緊要搵得番姐
最後就梗係消失咗啦
比爸就梗係非常嬲啦
之後就係佢哋所謂定落嘅唔合理賠償啦
我老公就梗係唔制啦
賠幾百蚊就想呃走佢件D&G
周旋咗一輪...工場就一定唔會賠得多
咁有剩嘅就由間鋪貼落去
但都係最盡賠番800蚊
比爸話800蚊買毛都未夠
但係呢...見間鋪個亞姐一直都賠過不事
唉~~~算吧...個工場仆街姐
當我哋黑仔
 
今年...我哋依舊去乾洗...始終都係街方街里...而且錯不在間鋪...亦有咗上次事件...今次我哋更唔會存倉...應該冇問題啦
哈哈哈~~~(苦笑)...錯晒
次次爛得都係比爸心愛嘅嘢
我嘅衫洗衰咗真係唔肉痛...因為又唔係名牌
但係比爸呢...今次整衰咗個件係上年去日本
比爸買俾大比的飛機師褸



大比已唔啱著...所以比爸諗住洗好咗就做收藏品
幾日前...鋪頭打俾我...話件褸啲皮有少少爛...咁仲洗唔洗
吓???有爛???
我叫比爸去了解啦
哇~~~比爸火到呢
少少爛...有幾隻字上面嘅皮爛到甩
冇玩啦...如果我拎嚟爛到咁...你收衫睇時有乜理由唔同我講
而且我拎衫去洗時都check過乜問題都冇
之後就係一輪鋪頭同工場兩邊扯貓尾嘅把戲
工場話一接到件褸見有問題就已彈番...所以唔係洗爛
鋪頭話佢可能當時忙睇唔清楚
比爸話之你哋講乜...而家錢就唔要...只係想要番件完整衫
你飛去日本買好...上網訂好...只係要番件衫

不過今日打電話俾工場負責人葉生後
我覺得一定要出信去告佢
一嚟佢態度好串...講番起上次唔見單嘢一啲悔意都冇
如果今次唔關你事...但上次個單關你事啦
然後仲話店鋪個個人盲嘅...咁都睇唔到
仲話我有我告...佢嘅態度一啲都唔care...因為佢冇錯喎!!!

當我打緊呢篇blog時...店鋪亞姐打嚟
因為我要呢個葉生嘅資料...工場地址...公司名
佢就打電話話個亞姐..."告都係告你哋啦...你哋做錯"
超~~~你理得我告邊個呀!!!你咁清白駛乜驚呀...光明正大俾資料人啦
你真係冇錯就一定冇事架!!!

待續~~~

 

水果週整個水果餸

大比呢期學校講緊水果
食水果嘅好處
之前已經叫每位學生買指定水果返學校
介紹完後就一齊整沙律食
今次就輪到家長做功課
諗一個用水果做嘅菜式
其實係自由參加嘅

雖然我煮嘢食唔掂
但有比婆婆嘛
想食乜就叫比婆婆預備好
我返屋企整番熟就OK

我諗到整雞翼
去骨後就塞入蘋果同哈蜜瓜
唔知會係乜味架
叫做有份功課交

叫比婆婆買好材料
幫醃埋好雞翼
順便去埋骨
我返屋企就塞啲水果落去
最辛苦個啲我都唔駛做
其實係好簡單

超甜哈蜜瓜 ~ 真係好清甜...我同大比兩個一路切一路食
蘋果 ~ 叫得比婆婆買嘅...一定又爽又甜
去骨雞翼


蘋果同哈蜜瓜切片
唔好厚切
如果唔係會塞爆雞翼
蘋果可以唔駛去皮


塞好啲水果


可以落獲煎至金黃色
開頭我諗住先蒸至七成熟
然後再煎
俾比婆婆話我唔好咁懶
慢火煎香先好食
唉~~~如果係比婆婆度
一個光波爐就搞掂唔駛煩


搞掂...影番張靚仔相
叫大比拎住又影番張
今晚有餸開飯




又幾好食喎
哈蜜瓜甜蘋果爽加埋啲雞翼味
比爸同大比KO晒
應該差極有個限啦

整好交功課


返到學校睇到人哋啲作品
哇~~~啲家長好勁
我做好自己就算...哈哈~~~
橫掂都冇諗過會得獎

大比3歲生日前夕

原本今日plan咗同比爸嘅fd一家BBQ
女的幼的就一直BBQ
男的就去打war game
不過比爸話之前先打先一場
太攰了都係唔去啦

咁我哋就出咗CWB行街街
因為皇室堡有kitty展
大比要去影相嘛
而且買咗一個生日kitty公仔
剩番最後一個係大比生日日子




之後就去咗樓上玩具反斗城
睇吓買乜嘢俾大比做生日禮物

開頭大比話想買BB公仔玩
哇! 成7百蚊...有乜好玩呀
佢對公仔係三分鐘熱度
睇過另一樣
最後佢鐘情於個kitty廚房
玩到叫極都唔走
成千三蚊喎...唔平
我同比爸都叫佢睇埋宜家個個先
再決定買邊個(咁樣先至叫到佢走)

難得叫到一個走
但另一個大細路又睇中其他嘢就係玩又唔走


食完lunch
就去宜家睇吓個廚房幾$
都成7百幾
但係呢...幾大座吓
屋企個位唔太啱放喎
最後買住啲餐具hea住大比先


等我比爸諗吓
係唔係買個kitty廚房俾佢
因為都諗住生日會用一舊錢
帶佢去廸廸妮或者海豚公園
都要洗差唔多咁上下價錢
但仲要計埋比爸人工呢
因為佢冇大假放
如果咁樣就變相仲貴咗
而且我覺去
去樂園玩就一次
但買廚房可以係屋企玩N咁多次
諗得過

晚上我哋落樓下食飯
有一間食越南嘢成日都有好多人等位
比爸話佢有牛油雞翼
想試吓睇吓係唔係真係咁好食所以咁多人

原本我哋叫外賣
但老細話牛油雞翼要等半粒鐘
等得半粒鐘我不如等埋位堂食啦
而家先落order
到時有位咪有得食囉

蝦餅 ~ 比爸話如果真係難食個間嘢可執得...因為唔係乜嘢難度菜


檬粉賣晒...河粉都係剩番最後一份 ~ 豬扒湯河
河粉好薄好滑...豬扒好味


蔗蝦
佢呢度好在係啲小食可以叫半份
咁晒我哋呢啲小數人食
可叫多幾款小食試吓


咖哩雞就一般啦...唔夠味道
叫番比婆婆煮仲好


炒雜菜


牛油雞翼 ~ 都OK啦...唔係話真係好重牛油味個隻


其實基本上係OK架
大佬呢餐200蚊有找
街坊價錢
但質數唔係差
仲想點呢
下次都會再嚟

嘆 ~ NESCAFE Dolce Gusto

無事出街少破財

今日出一出街又唔見錢

~~~以上係比爸行街後遺症~~~

 

而家行荃灣

幾間大型商場

夠晒你行之餘

仲要啲嘢係你有機會買

最怕係買到怕你荷包冇彈藥姐

 

先行吉之島

去大比鐘意嘅小天地

坐木馬

 

玩小遊戲

玩掉彩虹

今天有點運仔

得到唔少禮物

大比非常開心

尤其係個盒車仔(又係車)

 

之後就行一田

去白熊咖哩tea

大比最愛個度啲雞骨腸

 

之後去超市買了一大埋零食

係供接大比放學食用

正常嘅就買唔到

行了兩間超市

都買唔到尿片~~~冇貨

 

之後就去埋荃新天地

原本只係去CCK睇吓有冇平嘢執

同埋買我覺得超好著嘅leggings

再去埋uniqlo買啲底衫褲

(好著又抵著...我哋一家三口都鐘意...尤其買小朋友嘅...質料舒服又襟洗)

 

都天黑啦諗住走啦

但比爸見到好多人排隊拎嘢飲

原本佢見多人都唔諗住排

不過見到人哋杯嘢都唔細杯

排一陣姐

都抵番晒啦

於是就走去排

 

NESCAFE Dolce Gusto係度擺counter

 

初時我以為係麥狄文賣廣告個部

我話我對飲coffee冇興趣

點知原來唔係個部

人哋個部high好多

真係coffee only

而呢部呢

多好多選擇

比爸心思思想買

我話不如試飲咗乜味道先啦

 

 

大比揀咗蜜桃凍茶

 

我揀咗奶泡抹茶 Green Tea Latte

 

比爸就揀咗奶泡咖啡 Latte Macchiato

 

輪到我哋啦

有得玩有得飲

 

有奶的全部都係先打奶

 

我杯green tea...好香抹茶味...好飲

 

輪到大比的蜜桃茶

好唔好飲

見到大比KO晒一杯就知道

 

呢杯就係比爸的

 

好有層次感喎

 

比爸玩嘢

問可唔可以拉埋花

姐姐冇好氣答佢

機就拉唔到

不過自己可以拉

wahahahahahaha

 

基本上啲甜味係適中

除非你要飲好甜就自己另加糖

而奶味...啡味...茶味...濃度可自行調校佢俾嘅建議加或減1格

 

我哋試咗

都覺得唔錯

比爸話不如整番部

返屋企隨時嘆

 

佢有三款機

其實功能全部都一樣

$880的只係最舊款外型比較鈍啲

$990的就新款外型好啲顏色多點選擇

$12XX就係水箱容量大啲同埋格數個度係LED燈顯示

即係試範整俾我哋飲個部

 

不過sell我哋個個姐姐好中肯

話買990個隻就OK啦

千二蚊個隻睇吓你需唔需要咁大容量

其實冇水咪去加囉

都冇太大分別

而且個LED燈顯示

你可以貪佢型

但亦可以話你知會比較易壞

多二百幾蚊

睇你覺得值唔值

 

我哋都諗住買990個隻架啦

一嚟唔想咁大部

二嚟又唔想買最舊款

 

價錢嚟講

呢度同出面價係一樣

只不過呢

今日係呢度買

就送多兩盒飲品~~~tea latte同espresso

 

咁樣一千蚊就飛走咗

 

晚上

就急不及待玩吓先

順便試吓部機有冇事嘛

佢原裝盒內都有送四款飲品俾你

Chococino ; Latte Macchiato ; Lungo ; Espresso

 

比爸試了Espresso

 

 

好細杯架

純咖啡

好香濃

不過呢

比爸話佢都係鐘意加有奶的啡

但如果你鐘意勁啡

呢杯好OK

 

我就試了奶茶

 

 

我鐘意飲呀

因為好似我鐘意飲的珍珠奶茶味道

 

個sales姐姐仲推介我哋

朱古力都好飲

但當時已經冇晒朱古力

所以我哋試唔到

 

飲品多數可係大型超市買到

亦可以經網上訂

滿500蚊就免費送貨

而且網上貨品比街會齊存啲

 

另外仲教我哋點整鴛鴦

同埋話我哋聽cafe au lait ; cappuccino ice ; mocha

味道就比較最差

其他的都唔錯

 

而家想飲乜

只係幾個step

就有杯美味飲品

又唔駛點清潔喎

good晒我哋呢啲懶人