回娘家渡假

比爸呢個星期六日去打過夜war game...我就同大比回婆婆家...返自己以往個私竇渡假去~~~

 

星期六下午book了洗牙...就順道逛逛葵涌廣場...呢度有好多以前讀TI的回憶

廣場雖然變了好多...但有樣冇變的是...有心機的話...依然可以執到平靚正貨式...好可惜...我係呢度買唔到衫...因為太肥了...呢度啲平衫我著唔入

雖然衫買唔到...但童裝或者其他雜貨都好多選擇...但係都係忍忍手唔好買...一嚟財政短缺...二嚟...自己空間有限...都係唔好買咁多嘢好

有間賣配飾同髮飾的小店鋪...個sales姐姐好好人...好努力介紹產品...我雖然對啲配飾(頸鏈...耳環)有興趣...不過呢...而家都冇時間打扮...買嚟做乜呀...所以只係買了髮夾(我同大比都有份)就算囉!!!以後如有機會打扮...再嚟選購

 

*******************

 

好耐都未試過食飽飯就可以捐上床hea呀...雖然張床唔係大...我同大比一齊瞓係有點迫...不過勝在舒服...不竟係陪我過了N年的竇嘛

 

八點半就爬上床hea...不知不覺就瞓著了

瞓到第二朝八點起床...何其滿足

 

晨早起床清新開朗

 

因為公公同亞舅尚搵緊周公...大比醒咗一定嘈...廢時大比係度擾民...就同佢同埋婆婆去飲茶

 

商場內已擺放聖誕擺設...大比話要影相

 

返婆婆度飲茶...唔駛驚要搵位問題...因為我哋一定會同埋婆婆啲C9 friend坐埋一枱...熱熱鬧鬧

 

呢啲長期客戶...有指定枱坐...酒樓上上下下都識得七七八八...屋村的酒樓就係親切啲...雖然冇五花八門的食物...又唔係話超特別好食...不過水準都唔差...又方便...一班人一枱食物...嘻嘻哈哈又一餐

 

大比之前俾婆婆湊咗一輪...佢仲勁過我...識人多...著數多...已列入熟客之一...而家要返學少咗嚟...好多人都掛住佢

 

呢啲快樂舒服日子好快又過去...回家後就要開始做唔完的工作

 

大比而家好痴我...我同樣...而家好想痴住我媽媽...哈哈哈~~~