第一次親身感受落冰雹

谷咗一個下午都冇乜點大雨過
到旁晚時候就開始嚟料
又大風又大雨又響晒雷
不過天氣台已預告有呢啲發生
所以落咗雨反而覺得冇咁焗涼爽番幾好

不過呢到8點半左右
我哋一家準備離開比婆婆家回家
就係屋企樓下大堂等車時
突然落好大雨
橫風橫雨個隻
但車未到我哋唔駛出外
所以唔覺有乜問題
不過見啲人返嚟個個都濕晒
準備出外的人亦唔敢外出住
都係諗住過咗呢場雨先

點知呢場雨不單越落越大
仲落起冰雹嚟
初初聽到B lei爸啦
以為啲雨大到咁
但係睇真啲
見到一粒粒嘢架喎
再聽埋返嚟啲人講話俾啲冰打落隻手度好痛
而著拖鞋嘅人就話地上啲水好凍
冇錯啦
落冰雹

雖然上到車
但四周圍都係水浸
仲有車死埋火係度
即係又要運路行
剩係一個九龍城都兜同等都差不多一粒鐘
平時約20分鐘車程
今晚就用咗2粒鐘
好彩係老爺車我哋返屋企
如果call的...又塞車又要慢駛
睇住個錶跳吓跳吓
真係個心仲寒過啲冰雹

塞車期間
大比就呼呼大覺
話知外地打成點落成點
媽媽把住瞓最爽
我哋就係不停睇FB
睇吓冰雹大雨造成乜嘢傷害

啲冰雹洗版相一張誇過一張




不過啲商場同地鐵嘅損毀就真係堅啦


好彩我哋一早入唔到龍翔道
如果唔係
過得荔景個關
都過唔到黃大仙個關
到時唔係2個鐘返屋企
4個鐘都唔知得唔得

比爸見人哋放冰雹相放得咁過引
佢又放埋一份
真係笑死人

搵到了啱我用的洗頭水 ~ 呂

其實"呂"洗頭水應該都hit咗一排
但我呢而家啲資訊咁落後
前排見朋友係FB話係韓國訂了批洗頭水
我發現有呢個品牌

見唔係話貴
又有朋友訂開
未又試吓新野
我買咗紅色同黑色試




紅色我未用
人哋話黑色係好嘢
因我啲髮質好差...勁開叉...又乾
所以試黑色先

好大人參味...洗落頭髮到已覺得好軟滑...以為會好潤...但過了水後就變得清爽唔會話有立痴痴的感覺...因為我冇配到護髮素...我就用番L'OREAL professionnel粉紅色系列的護髮素
以往洗完頭都要加埋L'OREAL professionnel Mythic Oil的...而家唔駛啦!!!吹半乾頭髮後...頭髮仍然柔軟...而且仲好爽...打click情況大大改善...仲有係用了幾天...我開叉的頭尾漸漸消失...呢個我非常開心

之前有試過Mane n Tail
貪佢話佢令啲頭髮生得快
但係我用了一年多
都唔覺頭髮生快咗
一樣都係咁慢
一年唔剪髮都唔長唔過3寸
而且用呢隻洗頭水洗完啲頭髮好乾
事後唔落護髮素唔搽護髮油就根本唔駛諗可以順利梳到頭
click到亞媽都唔認得


另外我亦用過L'OREAL professionnel的系列
粉紅色的係幾好唔錯...護色一流
之前染紫色時...用了呢隻洗髮水...係可以keep住啲色冇咁快甩
不過佢改善唔到開叉情況
黃色亦用過
但係我唔會再用
因為用完個頭勁立痴痴
太潤啦...潤到個頭髮乾咗都好似人哋幾日冇洗頭咁
但佢潤係髮根...髮尾又唔見佢潤
一樣又係會打click同開叉


"呂"洗髮水暫時我覺得好OK
下次等我試埋紅色先
睇吓又有乜分別

一人一花活動結果係~~~

好啦!!!種咗一段時間嘅"新畿內亞鳳仙"要交功課啦!!!
盆花連到成養手冊一同要交回學校


要畫圖的地方就搵比爸幫手








四個階段成長都要影張相留念吓


萬幸盆鳳仙捱得過呢個冬天
冇變咗香香公主


雖然唔係種得靚
未開花
但總算有高過
而且仲被我發現出咗個小小花蕾


未趕得及開花有少少可惜
但見到有花蕾已經無比興奮
算叫有點成績吧

返到學校睇到人哋種到有聲有色
自己個盆雖然比下去
不過呢
有努力過已經足夠啦
比嚟比去有乜好比較

搵亞舅同姐姐分擔吓，呵！

原本又係得我哋兩公婆帶住隻大比去hea
點知咁啱約我細佬去改手機plan
又咁啱佢同佢女友又冇事冇幹
哈哈哈
咁不如跟我哋一齊
遊吓玩具反斗城
順便幫我湊一陣大比啦

去食個芝士麵醫飽個肚先
比爸話而家出街食餐飯真係唔平
所以好似我細佬呢啲拍拖人仕
真係要慳都有困難
所以我細佬話根本唔會行尖咀呢啲地方
食又貴又唔會去啲鋪頭消費

差不多行到海運
大比就開始醒
我都話佢好神奇架啦
就嚟到玩具反斗城就好似聞到味咁
會自然醒

今日我同比爸唔駛爭住揸(BB)車啦
因為陪大比娛樂就交比亞舅同心如姐姐
尤其係去到踩單車個度
成日玩到唔肯走
但佢又唔識踩
推都推到腰骨痛


開心咗一輪
大家都諗住散水架啦
點知我細佬睇到有冒險樂園
哈哈~~~呢度係佢哋成日會消費嘅地方
我哋呢...絕少會去
因為大比一入去又係樂而忘返
但今日跟咗亞舅佢哋入去玩
woo.........成家人都樂而忘返呀


我哋掟彩虹一啲運都冇
但係心如姐姐就係幸運女神
佢哋之前成日都掟到中獎
500蚊惠康卷都掟到返嚟
我見到個一隻格仔
唔好話掟...叫我放上去都分分澤界啦
今次佢哋雖然仲唔到乜嘢大獎
但係又中到啲細格仔
益咗大比囉
可以揀禮物
大比揀咗米奇筆袋

雖然掟彩虹我哋冇運
但俾我搵到部機
一路放銀仔
可以一路出飛仔


玩咗140個銀仔後
就儲咗14XX張飛仔
雖然可以有嘢換
但唔係心水囉
我細佬話儲吓先囉
佢6千幾張都未換嘢
等到有心水才換

我終於明點解除咗細路外
C9都會沉淪在此地
呢部不斷出飛飛嘅機真係好吸引
下次包保我又會再嚟幫親

兩公婆亂遊行元朗

兩公婆今日放一天假

旅行就冇時間去啦

放日唔駛湊大比嘅假都可以吧

 

朝早如常送大比返學後

私人時間開始了

本想去睇早場

可惜呢

想睇嘅戲都落晒晝了

連DVD都就嚟出

仲想係戲院睇

 

嘆個早茶先啦

之後再慢慢諗去邊

 

食飽飽

同老公決定入元朗

睇吓有乜好食

 

係鑽石山搭巴士入去好快脆半個鐘度就到

一落車

um.............應該行邊好呢...................wahahahahaha

 

對上一次嚟係四年前

大家都仲拍緊拖

入嚟係去南生圍影相

然後去B仔度食涼粉

 

所以比爸話...去B仔度食嘢啦

記住我哋係一啲都唔熟路

雖然睇住地圖

但應該都係行咗好多冤枉路

不過我哋有的是時間

當散吓步囉

橫掂呢啲地區空氣比市區好好多

 

 

經過街市後應該好快會到B仔

點知....................

 

未開門

要十二點半先開

 

而定先十一點

比爸話四圍行吓先囉

行吓行吓去到最旺的大馬路

 

輕鐵先得多...不過未坐過

 

大馬路兩旁都行晒

比爸話乜呢度冇商場嘅咩

住呢度幾好喎

無乜好消費(對比爸嚟講...冇啱佢買嘅嘢咪冇乜消費囉)

行完都只不過係11點九

好難等到B仔開喎

最後我哋行去搭西鐵諗住搭鐵去屯門

 

點知當我哋就嚟去西鐵時

原來呢度有商場架

係一個屋苑下面

行咗一陣

見到有間starbucks

然後望望個鐘

仲有15分鐘B仔就開

不如飲杯嘢又行返過去食囉

是旦啦

 

來來回回B仔附近嘅街都唔知幾多次

行到熟咗

知道邊條係最快最直接到B仔

不過有樣搞笑係

個度有個商場開賣

啲經紀見到我哋兩隻嘢來來回回咁多次

都諗住唔係咁早都見鬼呀...哈哈

 

對上一次食B仔就係四年前

比爸係想食佢個雞翼尖

雖然辣...但又真係好好味

 

 

B仔都有唔少強國人幫襯架

不過見到佢哋食唔晒啲嘢真係覺得好浪費

一個B仔涼粉只係食了五分一度

仲有大大碗係度

 

目標達到

搭車走囉

諗住搭小巴出旺角

唔駛轉嚟轉去

點知..........中招啦

呢程小巴搭了個半鐘有多

比爸話坐到patpat痛呀

 

仲有少少時間才去接大比放學

行了LP一陣

又買嘢啦

買咗對NB波鞋

其實因為著緊個對開始要爛了

見到有啱心水咪買先囉

橫掂有人讚助...呵呵呵

 

游閒時間過得快

又係時候要接大比放學

買個泡芙俾佢做點心

大家一齊都開心

大比第一次參加朋友仔的生日會

今日多謝YY嘅邀請去參加佢嘅3歲生日會

大比係第一次去參加呢啲有咁多小朋友嘅活動

講真我真係冇同大比舉行過乜嘢生日會

因為唔係識得多小朋友

多數都係大人

所以搞個生日會都唔知係娛樂邊個

 

YY個生日會係一間佢以前上playgroup嘅地方舉行

YY媽媽係邀請生日會時已表明唔好買生日禮物俾YY

如想表示心意可送生日卡或者小小利是係OK嘅

我好鐘意呢個安排

因為說真而家一份玩具真係唔算平

買了又唔知個小朋友鐘唔鐘意

就算當時係鐘意

但三分鐘熱度過後呢

為咗唔好浪費

生日卡可有紀念價值

小小的利是可以用作好多用處

 

我同大比就送了張生日卡加埋小小心意

 

 

 

生日會由5點半開始

陸陸續續有小朋友嚟

因為都算好多陌生人

所以大比一到門口就唔肯入去

扭咗一輪我抱佢入去先得

後尾見到YY先至慢慢放下介心

 

等緊小朋友到齊前

先俾啲玩具佢哋熱吓身先

 

緊住就開啲小食

薯片...糖...檸檬茶

小朋友多麼愛呢

大比啲咳未好得晒

但個個小朋友都食

點可以叫到佢一啲都唔食呀

所以同佢講條件

唯獨是糖真的不能吃

 

小朋友到齊了

就可以開始玩遊戲

先俾啲波波俾大家熱吓身先

但熱身時都已經有點控制唔到情況出現

 

講真...一班小朋友...要佢哋規規矩矩咁玩根本冇可能

 

 

 

 

玩咗三個遊戲後

就輪到切生日蛋糕環節

又係另一個難控制嘅局面

 

唱生日歌時仲正正常常嘅

但一唱完要吹蠟燭時

個個都爭住去吹

點完又即刻吹息

最後點咗幾次算吧啦

影大合影

 

要影得正正齊齊

係冇可能囉

 

切完蛋糕就輪到開餐時間

除咗有叫外賣...還有自家制食物

 

辦一個咁嘅生日會

我真的好佩服YY媽媽

唔好講錢銀幾多

就係個份心意

已經係無價寶

我絕對冇咁嘅能耐

 

食咗一輪嘢

 

又係玩具時間

小朋友有得玩好過叫佢哋坐定定食啦

 

跟住就係抽獎時間

雖然真係有抽到

但其實最後係位位小朋友都有份禮物

另一樣佩服YY媽媽嘅係

佢會因應唔同小朋友喜好

買佢哋鐘意嘅書本

大比好開心有呢份回禮呀

 

除咗書本

仲有大型輕汽球

將呢個生日會畫上完美句號

 

最後再次多謝YY一家誠意邀請同熱情款待

 

祝佢哋一家健健康康...開開心心...永遠都幸福快樂

 

大比今晚好盡慶呀

因為返屋企沖完涼後

就大覺瞓去

蕭骨...祝你好走

蕭骨捱到今朝...終於都走咗囉!!!

走得好安祥...走時雙眼番而變番正常...冇腫到

唉!!!唔通我真係命中養唔到龜...餘下蕭肉...希望佢可以健康生活落去

剩番佢一隻...都唔知買唔買多隻陪佢好...驚買多隻...又害咗龜

原本最活躍嘅你...一放你出嚟就四圍爬...但係返完鄉下返嚟...你對眼就腫咗開唔到...滴了藥水都冇好轉...之後仲見你嘔泡泡...其實已有心理準備你隨時會走...但都有一線希望奇績發生你會好番

比爸第一日見我養都唔多讚成...原因係就是唔鐘意"離開"呢一刻

其實人生總有好多離離合合嘅...

蕭骨下世希望投個好胎...搵到注好人家啦~~~

以往去花展同現時去花展的分別

天氣雖然天陰陰...但總算冇落雨...所以都諗住帶大比去花展睇吓

 

去花展前帶大比去亞貓地攤食lunch先...順便探吓啲貓貓

 

大比超愛食呢個多士

 

你話天氣唔太好...但依然好多人入場...睇花嘅人多...影花嘅人一樣...唔一定要好天氣才多人影相嘅

 

記得以前同比爸嚟影花...真係慢慢摸...慢慢影...影一個地方都可以影半粒鐘以上

 

但係呢架...帶住大比...一定要以極速攝影手法影相

有位就攝埋去~~~唔係唔想排隊影...但係啲強國人會同你守規矩咩...你讓得嚟不如唔好影囉

就算你影緊佢咃都可以照睇你唔到攝埋嚟...所以呢...我帶住大比...一嚟影細路已唔易...又要對付啲強國人...只要影出嚟張相...影到想要嘅嘢...同埋唔鬆郁檬就已經收貨

 

幾張影得幾開心

 

今日大比成日都鼻哥燶朝天嚟影相...冇嚟正經...有個影張姐姐叫我試吓唔好拎部手機咁高...佢會低番個頭...好多謝姐姐俾嘅意見...不過呢...呢個八妹係擺明玩嘢

 

除咗影相...我仲買咗個小盆栽~~~吸財樹...希望幫我吸番多少收入返嚟啦!!!

 

雖然冇機專業相機在身...但都想影吓啲花花草草

 

但係呢...大比已經俾咗預警我...佢行到攰...想瞓覺

哇~~~我冇帶到車仔架!!!抱住佢瞓我會一齊瞓埋~~~~~~落地

所以拿拿聲帶佢去皇室堡...係starbucks好彩搵到個soft化位坐嚟...買完杯熱朱力...大比都唔飲好快就入睡了

我就係咁抱住佢粒幾鐘...順便等埋比爸收工