大比病了偷一天閒

近排肺鏈球菌好勁...見大比有幾聲咳...而且昨晚有發燒添...雖然食咗退燒藥出咗一身汗退咗燒...但係穩陣起見...都係帶佢去睇醫生好啲...聽吓個肺有冇事...就嚟放假...快啲醫好佢...咪好似上次咁拖吓拖吓...搞到又中耳炎又要食抗生素咁麻煩

 

十點左右去到法國醫院睇...哇!乜咁多人架...登記處...俾錢...攞藥全都係排長龍...真係好多人病呀...尤其係細佬...有七成是小朋友睇的...心諗緊唔知要等幾耐添...好彩我冇指定醫生睇...咁姑娘就安排個快啲嘅兒科醫生...最終由登記到取藥...只係個幾鐘...算係快囉!!!

 

期間大比見到佢個同學仔...同我講話見到邊個邊個...我仲以為佢病到眼花...點知一睇...真係佢同學仔呀...又係發燒咳囉...係學校一個傳一個係咁架啦...今日好似有六個要請假(包括埋我個女)

 

睇病時...我同老公講...好多大陸人嚟睇呀...老公嘆為:難道呢度都要俾強國人攻佔?

 

另外老公又話...做醫生...真係錢搵佢而唔係佢搵錢...雖然要成為醫生過程係辛苦...不過都明白點解仍然仲有好多人去考...除了有醫者父母心外...最大魔力都是名與利...尤其而家個地球越嚟越多病菌...醫生永遠求過於供

 

問我想唔想個女做醫生...不是我想不想...是佢點諗...最緊要係要珍惜讀書時間...才有理想可談...唔好好似我咁...讀書唔掂...又冇一技之長...一事無成...而家個社會...已經唔係話你肯拼搏肯捱就有出頭...所以都明點解有咁多怪獸家長出現...希望我可以理智點...唔加入為其一啦!!!

 

睇完醫生...大比食咗藥就想瞓了...好彩有帶BB車...佢有佢瞓...我就同老公偷閒四圍去吓

 

襯有時間...就去車公還神...估唔到今日係好日...老公都話...好多嘢都整定...之前仲諗係邊個星期六日才好...點知就咁啱今日得來半日閒...仲要係好日子...多謝車公保佑...一家人能整整齊齊...身體健康...再好啲就梗係財富增加...有個自己的家園啦~~~

 

之後就出了尖咀行...過了lunch時間...去邊度食都唔緊要

咁就一風堂啦


味道係唔錯...不過我同老公認為...應該有味精...因為返到屋企勁口喝...老公佢口喝唔出奇...但連我都勁想飲嘢的話...冇味精...我不信囉~~~

大比醒咗...就買個燒餅佢食...然後再食多次藥...之後見佢精神唔錯...就帶佢去海港城影相同玩具反斗城行吓

平日都咁多人...星期六日真係梗不可想像
每次如有機會平日出街...比爸實會講...乜咁多人唔返做(返工)...我哋真係命苦囉!!!

咁多個公仔...大比都係最愛毛毛


平日算好一點...影唔到雜物...同埋唔算迫人...都有啲心機想影吓相




玩具反斗城又係少人...遲吓就越嚟越多人架啦...因為聖誕節...買禮物俾小朋友嘛
我哋都叫大比自己揀一份禮物...佢梗係好多樣都啱...雖然叫佢自己揀...但我哋都俾咗啲意見佢...例如屋企有冇...實唔實用...係唔係佢自己會經常玩
大比有好多都想要...我話...咁你自己努力儲錢才買佢哋囉!!!
雖然大比而家連數目字都唔太清楚...只係學1-4...但我哋都諗住慢慢教佢如果運用金錢...因為每次佢一見到自己鐘意嘅嘢...就要扭計買...比爸多數都會妥協買俾佢...但好多都係三分鐘熱度...買返屋企擺多過玩...我如果係身家豐厚...家住過千尺...都可能會俾你咁買嘅...但係我哋係平民百姓...而且亦唔想大比覺得只要佢要乜就有乜...所以我就想...每天如果大比乖...就俾一蚊零用錢佢...叫佢自己儲...儲夠就買自己想要嘅嘢...每天一蚊...真係要儲好耐先會得到自己嘅嘢架!!!就係要佢知道...""得來不易要學懂珍惜""...等佢再大啲...先再教佢一啲觀念
起碼而家佢每次想買嘢...我只要講...你儲夠錢未...佢就話:汶汶有錢......係...你係有錢...但唔夠呢...儲夠再嚟買啦!!!咁樣...佢就放低唔買了...會開始明白...點解唔買得

最後我買了架消防車俾佢...唉!!!女仔人家又會鐘意車都有...而比爸呢...梗係留番份大禮由佢送啦...哈哈

好啦!!!就嚟收工時間...會多人...歸家好囉!!!
本應今晚又係叫外賣煲仔飯嘅...但係諗諗...自己簡簡單單煮咪仲好...所以就煮煲飯...炒飯good晒...整啲午餐肉加啲栗米啦...又一餐搞掂


雖然我煮嘢食唔叻...但見佢哋食晒...大比自己食了兩碗...都已經好開心啦!!!