大比太囂張了

小朋友學習能力高
好多家長都想咁樣
但因為佢哋仲未識分好與壞
所以好同壞都會同時吸收

今日放學老師邀請同我傾計
我都知大比又出事
除了近期成日都同同學仔講
""哼!!!我唔睬你""
""你曳呀!!!我唔同你玩""
事實上...最曳未就係大比你囉
咁冇禮貌
今日俾老師罰埋一邊坐
等佢話唔同同學仔玩啦
咪自己一個囉
我同老師講...""好呀!!!最好罰佢成日自己一個""
等佢知道唔係佢唔同人哋玩
係人哋唔受佢玩

還有另外兩件事
大比把咀係比較識講嘢
再加上佢聽到嘅說話
一聽就學曉而且仲識變通
唉!!!有好有唔好啦
因為佢唔知邊句講得邊句唔講得嘛
其中一件事~~~
林老師叫佢做嘢...佢居然同林老師講...""你唔好似為你係老師就可以叫我做嘢""
我聽到都O晒咀
邊樹學返嚟架~~~

仲有另一件
放學時常常會同老師傾計
佢雖然係N班小朋友
但因為佢能對答如流
講嘢好似大人咁
不過佢講嘢有堅有流
作家嚟...可以講到似層層咁
但老師們都幾鐘意同佢傾計
有天佢問廖老師手上的東西係邊個買
老師答佢自己買
大比講""自己買?點解唔係爸爸媽媽買呀...你爸爸媽媽唔錫你呀...所以唔買嘢俾你呀""
老師解釋...因為自己有錢...所以咪自己買自己鐘意嘅嘢
但大比繼續講...""我爸爸媽媽好錫我架...成日買嘢俾我...你爸爸媽媽唔錫你""
我聽完後勁尷尬呀
大比你真係好鬼串咀囉
我知道佢係唔理解佢態度上係出咗問題
但聽者就算明白但都唔覺係好聽

放學一路同佢行
就一路同佢""說教""
開頭我係好氣憤鬧佢
但諗清楚
現階段要佢知道做人唔好囂張係好難
根本未有能力分別到乜嘢係好乜嘢係壞
唯有要佢知道一定要有禮貌先
我成日都講
你有幾叻幾聰明又點
做人處事品格唔好
人哋覺得你黑人憎
就算你有幾本事
人哋都唔會欣賞

好多謝老師係各方面提醒
我先可以知道從何入手去教
比爸有諗過轉唔轉校
會唔會搵間人哋話口碑好個啲
其實俾你轉咗間好
但係唔係保證其他人行為品格上都係好先
每間學校都有好分子同壞分子嘅
我覺得最重係老師有冇心機去教導姐
一班二三十人...得個兩位老師
你話冇偏心就假嘅
多多少少都有
老師有同你投訴但冇時間同你教
都係得個吉
而家大比讀個間學校我真係唔覺有乜問題
雖然佢哋學術上未必及得其他學校
但行為品格上好注意
呢樣我至like
大比由最初入學時性格野蠻
只要老師說佢不是
就唔理三七廿一放聲大哭
以為可以嚇怕你唔再鬧佢
到而家佢做錯事
老師話佢...佢雖然係唔開心
但都肯聽老師講解要明白錯係邊
有時心裡面唔服氣
但都不能亂發脾氣
老師有同我讚佢呢方面改善咗好多
比爸其實俾多啲時間了解吓個女
唔係一味靠錫同就晒佢就係對佢好
日後佢唔尊重你...你唔好賴我
付出同回報係相等的

老實講...老師只不過係我哋唔得閒時幫手協助教吓小朋友...不能將所有嘢都推晒俾老師...始終家長身教係最重要...所以我幾辛苦都要自己湊大比...我都想有自己時間...自己自由...自己玩樂...假手於人好易...但就唔好有要求...想自己啲仔女好...點都係要親力親為...襯而家小朋友仲以你為中心嘅時候你同佢唔相處好...唔好好教導...漸漸長大佢有佢天地時...你到時想教談可容易...除咗性格開始定型外...又因為接觸得多外界事物...你嘅說話還有說服力嗎???而家唔一點一滴累積...日後冇機會後悔

雖然麻煩但都要堅持

幾煩都要告個位不負責任嘅洗衣鋪
私下商討搞唔掂
再經消委會都係傾唔掂數
最後我哋詢問過律師意見後
決定告上小額錢債處追討賠償
雖然過經係煩覆同埋要自己處理
查BR...交申訴表...上庭
好彩呢啲嘢係我工作上有部分做過
而且又近我返工地點
唔駛要專登又盲摸摸去處理
不過就算真係好煩
但為咗對自己對件事有交代
我都要做
對方就係想你覺得煩而唔去追究
好難啦
我點都要麻到佢
無論最後結果係點
起碼我有做過嘢
唔會後悔先

律師雖然話我哋勝數係高
但小額錢債始終有別於其他法庭案件
除咗証據外
亦都要好睇當日處理案件個位法官心情
講句唔好聽
如果個日心情靚又同情你件事件
一齊都好辦事
但遇着心情麻麻
覺得你件事係""搞得嚟嘈""
除咗會敗訴外
就算判你勝訴
但都可以話你無聊要你俾堂費
因為其中有條例係 ~~~

第25條...瑣屑無聊或無理纏擾的申索
審裁處可隨時駁回其認為瑣屑無聊或無理纏擾的申索，並施加其認為適當的訟費繳付條款。
所

所以除咗公義外
還要睇幸運彩數

動漫節@2014 後 大鍋口打邊邊

而家嘅動漫節...對我嚟講冇以前嘅漫畫節咁吸引...除咗冇睇漫畫外...又冇玩PC game...而家個啲動漫人物一個都唔識...自然興趣就不大...但今年比爸有意入場...因為佢話有啲PS3平game賣

動漫節比書展時時刻刻都覺得係多人...雖然要兜到行...不過好彩我陀住一個又拖住一個...可以行特別通道...唔駛話等三至五個鐘先至入場個隻...如果真係要我等幾個鐘...我寧願唔去

入到場真係好多人...不過都算叫行到睇到嘢...但係真係冇一樣嘢吸引到我...反而大比去玩啲抽獎遊戲...一定有禮物嘅...抽紙仔抽波波...廿蚊一次...佢玩咗三次...死都要玩晒先肯走...不過都幾好彩...唔係啲細獎...抽到有散子包...頭飾同咕o臣仔...全都值回票價...算唔錯啦!!!

比爸就去排隊買game...我同大比就乘機開餐食住包包等...不過比爸係冇耐性嘅...佢排排吓就冇耐性...話太多人喎...又驚排到乜都冇得買...最後得個吉

雖然入場真正目的達唔到...不過都比大比見識吓...呢個男仔頭對公仔興趣一般...居然鐘意睇機械人...真係估你唔到

未夠三點就行完...走時見到越嚟越多人...始終早啲嚟好啲...因為之前都仲落緊大雨...而家就曬到燶...自然就會更多人出動

原本都諗住會行到四點幾...之後坐抵唞吓...就join兩個契媽六點鐘意打邊爐...不過咁早...不如回家hea仲好...因為我想坐多過想行

呢間係佐敦嘅大鍋口打邊爐...係任飲任食嘅...兩個半鐘...加埋一170蚊位(成人)都有找...而且啲嘢食新鮮...真係抵食架...所以大熱天時都係勁多人嚟食同等位...book枱都要預一個星期左右...如果冇book真係唔知要等幾耐啦

呢餐飯我同兩位契媽都食得好開心...不過比爸就話食到好攰...因為大比係咁痴住佢又攬又玩...我哋全場係度睇戲同食...點會唔happy呢~~~

遲吓多隻小魔怪...到時比爸你仲癲得快~~~

麥記 & 永合隆

今日有口福呀
試食兩間未食過嘅店舖

一間係麥記(唔係麥當勞囉)
食蔥油餅...餃子...生煎包...酸辣湯呢類食品


接大比放學時
順便等埋比爸收工
佢係佢返工附近(彩頤花園)買咗蔥油餅(5蚊件)...餃子(10蚊5隻)同埋生煎包(10蚊5隻)俾我哋試吓
比爸話佢食就唔錯
所以買嚟俾我哋試吓
我話大比都鐘意食蔥油餅(如果好食的話)
本來大比係食緊包餅仔
我俾大比食一口蔥油餅(呢條柚仔好估惑...會食少少試吓味先)
趙咗兩口
就即刻將佢手上嘅餅仔俾我
換我手上嘅蔥油餅走
我未食都知
一定好味啦
9秒9嘅時間換走我個蔥油餅
然後返到屋企
就試埋餃子同生煎包
好味...皮薄肉多又多汗
唔錯唔錯
可惜掛住食唔記得影相

到晚飯時
99話老爺去咗買燒味加餸
但去咗好耐
比爸仲笑說係唔係返咗深圳買
原來老爺走去太子永合隆買燒肉
呢間聽就聽得多
但始終冇買過嚟食
佢啲燒肉係貴
但仍然要排隊買
真係唔咸...肉嫩...皮脆
不過我都係覺得
間唔中食吓就算
因為真係唔算平
兩條骨燒肉都二百幾蚊

又懶又攰

冬天陀B比夏天陀B好 ~~~
係架!!!陀大比時...準備入秋...肚子越大時...天氣漸凍...冇咁辛苦兼且仲會覺得個人暖粒粒唔怕凍
但係而家呢...大熱天時...我自己一個人都覺辛苦...仲要多一個...加上而家嘅夏天一年比一年熱...一年比一年焗...出街真係係一件苦差

人哋話陀女比陀仔好 ~~~
我仲未知呢胎係仔定女...但我總覺得有啲唔同...因為陀大比時...食得又瞓得...但係而家冇胃口...周身唔妥咁...瞓又唔係瞓得好
如果遲吓驗到係女時...咁應該係同天氣熱...年紀大有關啦
如果真係仔...咁啲人又真係講得冇錯...陀仔比較辛苦

總之而家就係想乜都唔想做...又唔想郁
不過有可能咩
工要返...女要湊...家務要做
今次我應該唔會好似上一胎咁肥啦
暴脹50多磅
而家我體重冇升不單止...仲續少續少咁跌
都唔知開心定唔開心好啦~~~

地鐵的都會月票

原來地鐵又加咗價啦
車費又負擔重咗
真係加咗人工等同冇加過咁
乜都加...得個吉...而家仲要一年比一年慳
點解會咁樣架

原本都冇諗住買都會月票
但就算我每天去慳2蚊八達通費
加埋第二程有九折
都係車費會比之前付出多
所以諗諗吓
如果個個月假期少
能返工多個20日
買張都會月票始終係比較化算啲

400蚊一張有40程...一個月內用




收據要保留番
直至用完為止
因為如張卡中途有乜問題
可憑收據追查
如果冇咗收據
咁真係張卡壞咗
有可能自己要蝕晒餘下車程架


詳情可到以下查詢
http://www.mtr.com.hk/chi/whatsnew/citysaver.html