學校團年飯

大比返埋今日...就正式放佢哋嘅新年假

今日學校唔駛學生穿校服返學...著有中國過年特式衣服...而且仲有美味的團年飯一同分享

講真...如果唔係學校話要著呢啲特式衫...我真係未買過俾大比著...因為覺得就係著新年呢幾日好浪費...細路仔好快大...出年又唔啱著...所以每年買新衫都係買啲實際好...平時出街都著得

 

一早就係學校門口約咗幾個家長同啲同學仔影吓相先...好得意嘛

可能女孩仔多...男孩仔比較怕羞...定係見到大比會怯呢...哈哈~~~

 

大比最熟YY...所以佢係YY隔離好開心...亦好真情流露

 

男孩子因媽媽坐係隔離...所以先敢坐近大比...有乜事都可以拉住媽媽頂檔...哈哈~~~

 

 

學校團年的盆菜宴

 

除咗有美味嘅飯菜...每個小朋友都有一個福袋...明符其實的又食又拎

 

福袋裡有馬年錢箱~~~比爸...努力注資唔該

 

一封利是...一個福字...還有揮春

 

利是係大金牌朱古力一塊

 

買張揮春係啲唔同組別參加創意揮春的得獎作品

 

開開心心過肥年...初十一學校啟市

打邊邊,團團年

仲有唔夠一星期...就過新年了...所以今天帶大比剪番個靚髮過新年...都唔係有乜特別嘅...修一修姐...佢遺傳咗我頭髮好難長嘅差基因...比爸想佢流長髮...所以都唔敢剪太短

 

 

小女孩...好似總離不開齊陰頭

 

今晚我家做節...同以往唔同...比婆婆話唔煮餸啦...懶呀!!!哈哈~~~其實係驚天氣凍...個頭煮完呢頭啲餸又凍咗...點好食喎...不如打邊爐...熱住食...而且想食乜就買乜...方便又開心

不過估唔到呢排會回暖番姐...但好搞笑囉...今晚突然番風喎...有點涼...打邊爐打得好舒服

 

大比食飽咗...就同亞舅同埋亞舅女友心如姐姐玩...呵呵呵!!!亞舅被玩到有笑有淚...點解有淚...因為我大比都有點暴力傾向...鐘意玩扯頭髮...踩心口...平時係比爸做受害者...今日有人頂上...我一邊輕鬆開餐...一邊睇戲...開心到C...比爸也樂在乎~~~亞舅就...哎呀...當娛賓姐...hahahahahaha

 

~~~歡歡樂樂...常在我家...直到永遠~~~

送蛇迎馬行花市

今日係全港嘅花市開啟第一天...每天都嚟維園一次...已成習慣了

 

因為都怕多人...所以咁啱第一天就係星期六...就今日行一團先

今年大比大咗...識多咗嘢...行花市佢就表現得好興奮

 

唔知係唔係星期六關係...點解個花市好似年三十晚咁多人架

 

帶細佬去花市其中一個危險就係...會比人氹落答買嘢

開始行冇耐之嘛...哥哥仔sale大比買蕉...大比話鐘意...又話好靚...哥哥仔又落足咀頭...買蕉蕉送波波又送支花...本來就唔想買嘅...但大比雙腳好似用AA膠痴住個地...唔肯走...比爸...請付上金錢吧...唔係到天黑我哋都行唔完個花市

 

諗住買了一樣嘢俾大比...就可以繼續安心行...點知行咗幾步...大比又俾一班姐姐圍住...不過試帶大比鐘意嘅毛毛帽...啲姐姐仔又不停話大比可愛...又影相又玩...大比又玩得好開心...比爸話~~~又要買呀!!!你話呢...

 

 

咁落去唔係辦法...比爸話剩係行一條路都可以買到荷包乾硬化喎...所以即刻把住大比...都係唔好俾佢行落地...一陣又走去啲攤位度...唔肯走...大比見到乜都話想要...乜都話要買...頭暈了

 

不過抱住佢都有另一原因...因為...實在太多人啦...好似年三十晚咁...迫到行都行唔到

 

呢個係今年其中一個特式攤位

 

唔買唔買最後又係買...不過同大比講好...買埋呢個氣球...今天就唔可以買嘢啦~~~ 

大比諗住買恐龍的...點知賣晒...最後揀了tom物屎...點解女仔之家會揀埋啲男仔嘢架

 

到個女買完...就輪到比爸買...不過係買嘢食

 

最後行埋賣花攤...好頭好尾

今年我冇乜買花呀...只係買了盆風信子...蘭花影張相算~~~花開富貴

 

行完個花市...就去了皇室堡...多謝亞舅俾咗張haagen dazs 50蚊coupon我...令到我哋可以嘆到呢杯甜品

 

食飽咗大比又精力充沛...話要影廣場內的擺設

每個角落大比都影晒

 

最後去埋宜家為新年添啲貨品...去舊迎新...又充實的一天回家去

幫學校的天台扮靚靚

大比學校有天台...係平日俾佢哋放電用...有時唔一定要係課室學習...上天台...一路學又一路玩...小朋友好開心

 

早前天台維修...大比都話有一陣時間冇得上嚟玩...維修好就舉行了開放日...今天就再舉行一個"親子壁畫同擦日"...就係小朋友同家長一齊...為呢個帶俾我哋歡樂嘅地方添上一點點色彩

 

壁上嘅畫全都係由老師設計好同鈎畫好個圖案...然後就由家長同小朋友一齊將啲油漆填顏色咁填上去

 

又係一個好難得嘅親子活動

不過我因為要返工

所以派了比爸同佢去

 

起初比爸唔想去...不過我都幫大比報咗名先...因為我覺得呢啲活動好難得...如果到時比爸真係唔帶佢...我就請假帶大比去

 

真係好高興可以參加到...因為人數眾多...要抽籤的...我哋好有運抽到

 

以下嘅相由比爸同大比同學仔YY嘅媽媽提供比我...等我可留個紀念

 

 

 

好多家長都好積極參加

 

每個家庭都會被老師派去指定的地方填顏色

 

比爸話大比好開心好興奮...除咗有得玩...而且仲有得飲同食...上咗色一輪...學校提供飲品同茶點答謝各家長同小朋友的幫忙...有得玩有得食...啲小朋友冇乜理由會唔happy呀!!!

 

 

其實一其要上色三次先得...不過今日天氣唔係好乾燥...上完一次色都要等番一段時間先可以上第二次...所以家長同小朋友都係上完一次就當完成今日使命...但如果你有時間...老師們唔介意你哋繼續幫手...不過我諗只限家長啩...哈哈

 

期待個靚靚天台誕生...繼續為小朋友帶嚟無限嘅歡樂~~~

新家庭成員 ~ 蕭肉與蕭骨

去金魚鋪買黑石(風水用)

買完後望見一群龜

又想買兩隻返屋企養

但又驚好似之前咁

養極都係香

無論下至巴西龜上至百幾或幾百數一隻嘅飛河龜仲有唔記得叫乜龜

都可以俾我養到香

我仲俾我媽笑話我一定好長命

因為吸晒佢哋啲命

養到我好灰兼唔想再害啲龜啦

但今日我真係好想好想再養

事隔咁多年

冇理由我仲咁黑仔架

今次買大隻啲

應該會襟養啲啩

起碼唔好新年流流唔好意頭啦

 

我幫佢哋改名

一個叫蕭肉

一個叫蕭骨

因為肉個隻比較懶...成日唔多郁...唔多郁咪會肥

另一隻就好活躍...過度活躍性咁...肥極都有限

 

大比見到佢哋好興奮

成日叫佢哋食嘢

但因為新環境同天氣凍

佢哋唔食

大比就好勞氣咁叫佢哋食嘢啦...曳呀

比爸就笑大比~~~"係唔係好似你咁...食飯成日都要亞媽勞氣呢"

 

換水時就放佢哋係浴室散吓步

蕭肉真係好懶...郁都唔多郁

蕭骨就精力旺盛...周圍爬

 

大比成日都要擺住睇佢哋

希望今次可以成功養到

亦可以順便訓練吓大比啲脾性

繼續努力~~~還想肚腩減多幾寸

反反覆覆病咗一輪

因為食傷風感冒藥關係

所以停咗食reduze

而家病好了

就努力埋之前定落的三個月目標

食多一個月

睇吓會唔會再減得多啲

 

而家34寸腰~~~梗係希望可以減到30寸啦

而家149磅~~~可以的話回落番到140磅都好滿足

 

脂肪比例

 

 

繼續努力~~~

 

係喎!!!而家萬不寧做緊499蚊兩盒...好抵囉!!!

有興趣可以襯而家買番幾盒試吓

新年期間隔得幾多(脂肪)就幾多嘛

未減到原本的(脂肪)...但起碼唔好加番啲新(脂肪)都好呀!!!

可惜沒有去到的慶典

上星期六大比學校50周年校慶...老師早前已經問過兩次...真係去唔到...沒辦法...比爸請唔到假...我又唔好意思連請兩個星期六都off...大比又唔肯跟其他人...所以冇辦法帶到佢去

原來每個同學都有份上台表演的...有位同學的媽媽同我講...怪唔得老師會問有冇可能帶到佢出席啦~~~

呢排老師日日都同啲學生練習唱歌跳舞...大比都有返屋企又唱又跳...但我唔知係上台表演用...以為係平日的唱遊堂

同學嘅媽媽當日有去...仲send咗條片俾我睇...真係估唔到N班嘅小朋友...都可以上台表演...雖然唔係話跳得好整齊...但個個肯郁肯開心唱...冇喊冇扭計...已經算好成功啦

之後我播番俾大比睇...佢一聽到音樂就跟住跳跟住唱...比我想像中佢跳得有板有眼...原來老師都話佢係跳得唔錯...所以冇去真係好可惜...唉~~~

除了表演...仲有一段同學校說生日快樂的片...我同大比都有幫手出鏡...好多謝YY媽媽send呢啲珍貴片段俾我留念

雖然冇去到...但好彩學校都俾番本紀念特刊俾我...我好想要...因為裡面有我同大比嘅相同祝福


每個學生手做的50手勢


今年學校裡舉辦的活動有幸去參加


給學校少少的祝福


一班又熱心又有愛心又好勤力的老師們~~~姐姐們~~~同和藹可親的校長

為何要發脾氣呢

前排大比情緒好唔穩定...返學大喊...極痴身...又話唔聽...越叫佢唔好做佢越挑戰你去做...易扭計又易喊...總之所有表現都搞到你唔鬧佢唔得...唔對佢發脾氣唔得...動手又動粗...兩個都唔開心...兩個都有情緒病

當夜欄人靜的時候...自己平心靜氣想一想...點解會變成咁呢...平時話人哋父母咁做唔啱...要點樣點樣...但原來當事件發生係自己身上時...你咪又會同所謂個啲不知所謂嘅父母一樣

學校的主任係去旅行日同我閒談...話同學校嘅社工討論過...大比可能係缺乏安全感...所以造成佢情緒唔好...建議佢返學時可以帶一個公仔跟身...等佢有點安全感...睇吓之後情況會唔會好轉

點解會缺乏安全感...女仔常常都說自己缺乏安全感...不過細路嘅安全感點都同大人唔同
自己再想想...是否近期我自己怪獸咗...郁啲就鬧佢...佢又怕又喊條氣又唔順...佢有咁嘅情緒...點都同自己有關嘅

靜心想想...邊個都鐘意啲細路又聽教又聽話架啦...但事實上...會有幾多個係咁...父母想佢點就點...自己都做過細路...想吓當時...自己咪又係會激到老豆老母半生不死...為何到了自己嘅仔女...會唔明白呢個情況呢個道理呢

想大比好先搞掂好自己...我自己盡量唔好發脾氣先...大比曳時...盡量同佢溝通...道理會同佢講...但估佢唔明多...所以都以平常心同佢說說教...發脾氣只會將大家越拉越遠...事情越嚟越差

呢幾日返學...大比冇再喊...見到人都會叫早晨...同媽媽分開時會講byebye...放學時帶啲零食獎勵吓佢...大家一路行一路傾計一路開心笑...幾咁好呢~~~

雖然大比仍然會有扭計...又曳曳...挑戰你睇吓幾時鬧佢...但我會平常心同佢講...咁樣唔啱...咁樣唔好...要點樣點樣...佢會唔會即時明唔好理...總之就係要有耐心同耐性不停將啲嘢重覆又重覆...當有一日天你發覺佢有改變時...你就會好開心...努力過總會有回報

社會不斷進步...我哋父母個套未必合適而家用...取其好再配合自己同子女相處時將啲嘢改良再改良...總會找到快樂嘅空間...不要一味只管"教"...其實大家都是"學習中"

學習做一個好孩子
學習做一個好媽媽

話唔發脾氣...但唔代表我會就大比...不是就是不是...我還是會企梗...只是用一個佢會接受的方式說教...到真係好曳好曳時...我還是會罰佢企呢~~~

歲次甲午/十二生肖金銀郵票小型張 ~ 靈蛇駿馬

早前係郵局訂了的馬年紀念郵票

今天拿了

我冇集郵的興趣

只係單純鐘意馬

所以才定呢批郵票

下年還會訂

因為是自己的生肖年嘛

一定要留個紀念啦~~~

 

訂購詳情~~~

 

絲綢郵票小型張

 

首日封

 

套摺 - 靈蛇駿馬

 

以下個啲都是禮品...送的

2014郵票發行月曆卡

 

馬年金屬襟章

 

八達通套