肯瞓覺,比中六彩還開心

今日如常趕去接大比放學,黃老師帶佢出嚟,老師同我講佢剛剛食了餅乾,老師請佢食的 。我個女一定會老實不客氣~食。

然後就是例牌問問老師今天佢如何,有冇食早餐~有（開心）,肯唔肯瞓覺~有瞓,但我冇問瞓了幾耐,因為不好意思再阻老師太多時間。

一離開學校,就要有心理準備,大比的每日一扭~扭眼瞓。平時佢係學校冇乜午睡,所以我一接放學佢實扭幾扭計,之後就會扒係我膊頭睡著了。一直到回家都要我抱住瞓,唔肯落床瞓,就咁樣一抱個幾鐘。但總要食飯,我都想沖涼,因為抱佢回家成身臭汗,叫醒佢,又回到扭計時間,歸根都是唔夠瞓。

但係今天,出校門後冇扭計,只係想我抱,唔緊要,抱住佢快啲叫佢扒住瞓,點知佢話唔眼瞓,仲要沿途回家一直有同我傾計同我玩,又唱歌俾我聽。個一刻,我開心到爆,簡直好似中獎咁。大比唔扭計係好好玩的。

返到屋企可以快快脆脆沖涼幾咁爽,佢咁乖乜都想獎勵佢~俾佢睇“光頭強”；打電話俾爸爸叫佢買大比至愛嘅cake cake。大比知道有cake cake食,食飯都大啖大啖咁食,我真係好開心。

不過始終佢嘅午睡時間唔係長（之前亞婆湊佢可以瞓三四粒鐘）,所以差不多九點佢就扭計啦！扭計要搵周公玩喇！

好快就瞓咗,而家先至係我最free的時候。