大比終於病倒了

人哋話一返學,總避免唔到會病。就算學校點講究衛生,始終唔係一人照顧一個學生,學生有少病只要唔發燒都照可以返學。病菌始終會有,咁就睇你身體有幾健康頂唔頂得住啦！

 

大比終於頂唔住啦！傷風咳兼開始發燒。返咗學個幾月先病,算係咁啦！加上近期轉天氣,避唔到咁多。

 

我冇帶佢去睇醫生,因為屋企準備了藥,所以先俾佢食,冇好轉才帶佢去睇。雖然大比病,鼻塞又咳痰多,又有燒,但依然活躍,乜都照大啖食,咁都唔太過擔心。連我最擔心佢唔肯食藥都可以順順利利,果真大個女咗！以前佢一要食藥我就頭暈,扭計例牌有,仲要邊食邊嘔番出嚟。而家佢都係唔like啲藥味（有邊個會like,like都大吉利是,不過法國醫院的藥係好過普通診所嘅藥,冇咁難食）,但肯食,咁乖,俾塊餅餅賞勵吓。

 

比爸話間中發吓燒唔緊要,幫增高喎！其實有冇根據架！點都好,希望大比早日好番,病完又會強壯啲。