開始係學校唔用片片啦

大比其實已經識冇著片片時...會出聲叫大人俾便便盆佢坐...但開學至今我都係俾佢著片片返學...因為始終佢唔適應學校生活...如果情緒不穩時...多數實會賴尿尿...所以一直等佢習慣咗...先至再循序漸進

老師上星期同我講...話今個星期可以開始唔駛著片片...因為大比大致都適應咗學校生活...就算有片片時都肯坐廁所尿尿...而且佢班上只得十個女仔...老師決定幫女仔戒片先...但係午睡時...暫時都係著番片片好

今天接大比放學...因為唔太多人接...所以有多啲時間同老師傾吓計...大比今日戒片情況好好...冇濕過褲仔...只係老師話佢無論開大開小都係叫"屙C"...開頭老師真係以為佢開大...但其實原來係VV...呢個我知呀...教咗佢好多次都係叫"屙C"...算啦!!!暫時唔太刻意要佢一定改番正確...識叫去廁所我已經好開心

除咗講戒片片...老師有讚賞大比算適應得快...起初好爹要跟住老師外...食飯又食得慢...又會含飯又要揀人餵...遇到唔啱自己心意嘅又會發脾四...但而家...自己獨立咗好多...食飯快咗會自己食...有時還會添飯...含飯已經少咗好多(呢方面我係屋企體會到...佢真係有改進)...唔會再咁爹要痴實老師...不過呢就係情緒同脾氣方面仲要有待改善...始終有時忍唔住佢仍會大叫...好似老師話有時瞓醒...佢就大叫(佢把聲唔細)...全班就會差唔多醒晒...連隔離班都會問發生乜事...所以老師而家教佢...咀咀要嚟食嘢...講嘢...唔係大叫架

老師同我哋家長講番啲事情...係想我哋家長配合一齊教小朋友...只係單方面靠老師係學校教係唔work...返到屋企你唔教...咪又係得個吉...又會打回原形...所以只要有時間同老師傾開...我一定會配合老師去教導大比...點解我要俾佢返N班...而且一返就全日...我知道大比有乜問題(屋企佢一個獨大...爺爺嫲嫲甚至比爸都會好就佢)...越早解決越易解決...好興幸搵到間好學校...好老師...真係好感激

最後老師經常都同我講...大比把咀好叻...講嘢好叻記性唔差(佢係記性好...不過記得到但會唔會做得好係兩回事呀...哈)...雖然唔知佢明唔明...但回應你時係答得好爽口...而且佢唔扭計時...係好討得人歡心...因為我唔係學校一放學就去接佢...都過咗差唔多一個鐘先接佢...呢段時間佢會接觸高班啲小朋友甚至係其他班嘅老師一齊玩...其他老師都好喜歡佢...把咀囉~~~氹得吓人...尤其係呢樣...比爸可以放下心頭大石...冇俾老師討厭就good

學業好唔好我暫時唔著緊...同齡小朋友識好多生字又識講英文又話識乜我唔去比較...最緊要教好啲情緒思維同脾氣...有一定自理能力...三歲定八十...個格唔得...做人處事唔掂...任你有幾叻都發揮唔到所長