新家庭成員 ~ 蕭肉與蕭骨

去金魚鋪買黑石(風水用)

買完後望見一群龜

又想買兩隻返屋企養

但又驚好似之前咁

養極都係香

無論下至巴西龜上至百幾或幾百數一隻嘅飛河龜仲有唔記得叫乜龜

都可以俾我養到香

我仲俾我媽笑話我一定好長命

因為吸晒佢哋啲命

養到我好灰兼唔想再害啲龜啦

但今日我真係好想好想再養

事隔咁多年

冇理由我仲咁黑仔架

今次買大隻啲

應該會襟養啲啩

起碼唔好新年流流唔好意頭啦

 

我幫佢哋改名

一個叫蕭肉

一個叫蕭骨

因為肉個隻比較懶...成日唔多郁...唔多郁咪會肥

另一隻就好活躍...過度活躍性咁...肥極都有限

 

大比見到佢哋好興奮

成日叫佢哋食嘢

但因為新環境同天氣凍

佢哋唔食

大比就好勞氣咁叫佢哋食嘢啦...曳呀

比爸就笑大比~~~"係唔係好似你咁...食飯成日都要亞媽勞氣呢"

 

換水時就放佢哋係浴室散吓步

蕭肉真係好懶...郁都唔多郁

蕭骨就精力旺盛...周圍爬

 

大比成日都要擺住睇佢哋

希望今次可以成功養到

亦可以順便訓練吓大比啲脾性