還是把頭髮拉直吧

新年前...梗會去整一整個頭...個樣唔得...起碼都頭都唔好亂七八租嘛!!!

 

原本都諗新年前一星期先去整...不過見今日得閒...就今日搞掂佢...遲吓就會越嚟越多人...啲人做到攰都冇乜心機同你整靚個頭

 

今次唔電髮啦...而家天氣凍...朝朝叫大比起身都要時間...我邊仲咁得閒理自己個樣同個頭呀...日日都係滖水陸腳出門口...所以一定要整個瞓醒都唔駛梳頭就出得門口嘅頭先得

 

就係拉番直...哈哈...真係可以唔駛梳頭出門口架

 

不過就要剪起碼3寸頭髮...我都唔想剪...啲頭髮生得慢...好難先留得長...但係我啲頭髮長期缺乏保養...尾部開叉乾死一大把...唔剪唔得

 

除咗拉直...就係染埋髮...染開髮好難停...除非染番黑

今次染個而紫色底橙色...不過唔係好明顯...返得工之餘...比爸亦會接受到(比爸唔鐘意人哋染到七彩蝦條咁)

 

整頭係唔會帶大比的...但比婆婆唔舒服...係呢隻嘢近期脾氣臭又麻煩...所以都係唔好打搞婆婆啦...唯有帶埋佢...好彩比爸唔電髮...剩剪...所以比爸好快搞掂完就帶佢去行街先...咁我就安心係度整靚髮

 

今時不同往日...以往扮靚時間要幾長都唔覺得有乜問題...但而家...整個頭要4粒鐘...已經算快...但我都頂唔住...個patpat勁投訴...所以問埋我做唔做埋護理喎...咪玩啦...仲要我坐...唉!!!護乜鬼理呀!!!係屋企自己做算啦(如果唔懶肯做的話...哈哈哈)

 

比爸去咗洗頭...大比話幫佢霸住個位喎

佢唔係剪架...細路仔唔駛嚟呢啲地方剪嘅

遲吓帶佢屋企樓下個啲幾十蚊剪咪得囉...呵呵呵~~~

 

染咗都唔覺有乜色呢...好低調架