初次接觸手足口病

星期日...大比午睡後見佢面紅紅...比婆婆都話佢唔對路...我話係唔係天氣太焗熱...所以咁樣

到了晚上...大比瞓瞓吓...我發覺真係唔對路...佢有輕微發燒
因為大比之後發燒有不良前科...所以6歲前佢一發燒我哋都特別緊張
千萬唔好高燒...拿拿聲俾佢食退燒藥...希望冇事

成晚我瞓得唔淋...因為要留意住大比退咗燒未...有冇再燒過
好彩燒退咗...所以今天我都諗住帶佢返學...始終冇人湊佢

因為上星期五學校開始有懷疑小朋友中咗手足口病個案
今日返學時大排長龍
要每個小朋友都檢查清楚
而且大比個班有個小朋友都懷疑中咗招冇返學
亦有幾位同學仔有發燒而今天告假
真係唔知係因天氣焗熱時晴時雨影響而發燒
定係手足口病嘅潛伏期
有唔駛返工的媽媽為安全起見
就自行停課避一避風頭
老師們都讚成家長們咁做
大家都有好處

我交代老師大比情況後我都返工
整日同啲媽媽whatapp消息
諗緊...係唔係都俾大比避一避風頭
而家佢身體弱...分分鐘意易中招
叫比婆婆湊住佢一星期先

點知呢頭諗緊...下午老師就打電話俾我...大比又再次發燒...老師們都好似我咁...知道大比情況...都好驚佢發高燒...所以建議我早啲接佢放學帶佢去睇醫生好
冇計啦...試過上次一獲...我真係怕怕...原本諗住我帶大比去睇醫生算...不過最後都係叫埋比爸一齊去...有乜事都好...多個人照應

點解隔一排就要幫襯醫生呢...真係驚醫生冇飯開咩
次次嚟醫院睇証都係咁多人...今次起碼又要等番粒幾鐘
好彩大比今次精神好OK...我擔心少啲
輪到睇啦...唉~~~真係有手足口病嘅病徵...
可幸係...及早發現...而家只係口入面有兩點白點...手同腳都未有點點
希望食消炎藥打得抵...只要唔發燒...一切都易辦事
不過呢...學就一定唔返得...就算有冇事都好...我都諗住俾大比停課嘅
有咗手足口病...醫生會開假紙證實...之後要報告俾學校聽...然後要俾埋假紙學校...等學校上報教育局同衛生處...到第時要返學...仲要去睇一次醫生...又係要醫生寫証明你冇事...咁先可以返得學...so麻煩...即係有了呢個病...你最少要睇醫生兩次

手足口病傳染性強...所以人人都驚
小朋友普通傷風感冒都照顧得好辛苦
呢個病就梗加...小朋友越辛苦...家長越難受
所以希望大比食咗藥會好番...減少痛苦

醫生話每逢初夏開始...呢個病就高度危險...好難教你點可以避到佢
不過小朋友漸長大...身體強壯咗...會漸漸好啲嘅
而家中過一次招...就會對乜種腸病毒有點免疫力
但病菌年年都會進化...所以下次有新品種...又好難講
係囉...以前我哋邊有咁多花樣百出嘅病架
人類進步同時...病菌亦一樣